“Azərbaycan bundan sonra İranda yaşayan soydaşlarımız ilə bağlı daha ciddi işlər həyata keçirə bilər”.
Bu sözləri Ednews-a politoloq Qabil Hüseynli bildirib. Prezident İlham Əliyevin Türk Dövlətləri Təşkilatının sədri Bağdad Ameriyevlə görüşdə dünya azərbaycanlıları ilə bağlı açıqlamasını şərh edən politoloq qeyd edib ki, Azərbaycan dövlətinin müxtəlif ölkələrdə yaşayan azərbaycanlılar arasında mədəni bağlılıqların güclənməsi istiqamətində hədəfləri var.
“Dövlət rəhbərimiz bundan əvvəl də deyib ki, o, təkcə Azərbaycan xalqının yox, bütün dünya azərbaycanlılarının Prezidentidir. O, çox yaxşı vurğulayıb ki, ölkəmizin hüdudlarından kənarda yaşayan soydaşlarımız Azərbaycana məxsusdur. Bir dövlət olaraq onların istənilən sahədə hüquqlarının qorunması üçün ciddi səylər göstərməyə hazırdır. Onların hər bir ölkədə təhlükəsizliyinin təmin edilməsi bizim üçün çox vacibdir”.
Q.Hüseynli Azərbaycanın yaxın zamanda İran azərbaycanlıları ilə təmasları daha da gücləndirəcəyini bildirib.
“Hesab edirəm ki, ilk növbədə ölkəmizdə o tayda yaşayan soydaşlarımız üçün Azərbaycan dilində televiziya və radio verlişlərinə imkan yaradıla bilər. İran azərbaycanlılarının milli şüurunun oyanması və maarifləndirilməsi istiqamətində Türk tarixinin və mədəniyyətinin təbliğinə diqqətin ayrılması da mühüm məsələ kimi nəzərdə tutulur. Bundan başqa, biz müəyyən şərtlər daxilində onların Azərbaycana gəlməsi və ölkəmizdə müxtəlif elm ocaqlarında təhsil almalarına imkan yaradılacağını düşünürəm. İstər İranda, istərsə Türkiyədə, istərsə də başqa ölkələrdə azərbaycanlılar arasında mədəni əlaqələrin və bağlantıların gücləndirilməsi yönündə işlər daha sürətlənəcək”.