Ermənistan Türkiyə və Azərbaycanla olan sərhədlərini İran ordusunun qorumağını istəyir.
Bu barədə Ermənistanın “Hrparak” qəzeti məlumat yayıb.
Məsələ ilə bağlı Ednews-a danışan politoloq Natiq Miri qeyd edib ki, Ermənistan rəhbərliyi düşüncəsiz hərəkətləri ilə zaman qazanmağa çalışır.
“Ermənilər düşünürlər ki, regional və qlobal səviyyədə nə zamansa siyasi vəziyyət dəyişəcək, bununla da Azərbaycanla münaqişədə üstünlüklər qazanacaqlar. Amma onlar tamamilə yanılırlar. Bu gün regionda hazırki vəziyyətə nəzər salsaq görərik ki, Azərbaycan, Türkiyə və Rusiyanı prosesdən kənarlaşdırmaq və bura başqa siyasi qüvvələri cəlb etmək qeyri-mümkündür. Bu heç vaxt baş verməyəcək. Ermənistan rəsmiləri bu istiqamətdə əbəs yerə əziyyət çəkməsinlər, onsuzda onlar uğursuzluğa düçar olacaqlar”.
Politoloqun sözlərinə görə, İran Ermənistanda siyasi, hərbi və iqtisadi cəhətdən Rusiyanı və Qərbi əvəzləmək imkanlarına malik deyil.
“Ermənistanın İranla hərbi məsələlərdə, daha doğrusu öz sərhədlərinin təhlükəsizliyinin təmin edilməsində ortaq razılaşmaya gəlməsi o qədər də asan məsələ deyil. Hazırda Avropa İttifaqı və Rusiyanın vasitəçiliyi ilə Bakı və İrəvan arasında sülh prosesi gedir. Eyni zamanda Aİ-nın sülh formatında ABŞ da iştirak eləyir. Buna görə də İran qoşunlarını Ermənistana dəvət etmək, habelə Azərbaycan və Türkiyə ilə sərhəd ərazilərinin mühafizəsini bu dövlətə tapşırmaq demək olar ki, bütün sülh prosesindən imtina etmək anlamına gələcək. İkincisi, Ermənistan Rusiyanın strateji müttəfiqidir və Moskvanın izni olmadan heç bir siyasi qüvvə bu ölkəyə daxil ola bilməz. Bununla yanaşı, İrəvan səhv addımı ilə özünü Qərbdən də uzaqlaşdıra bilər.
Dünyanın güc mərkəzlərindən imtina edərək İrana üstünlük vermək rasional siyasət ola bilməz. Rusiya hərbi, Qərb isə maliyyə cəhətdən Ermənistandan əl çəkərsə, bu ölkə məhv olub gedər”.
Sonda Natiq Miri bildirib ki, “Hrparak” qəzetində dərc olunan bu məlumat dezinformasiya xarakteri daşıyır.
“Bu qəzet müxalifətə xidmət edir və müxalif cəbhənin ünsürləri tərəfindən maliyyələşir. “Hrparak” qəzeti Paşinyan hakimiyyətini gözdən salmaq və Ermənistanın Qərblə əlaqələrində problemlər yaratmaq üçün dövriyyəyə buraxılıb”.
