Xəbər verdiyimiz kimi, Azərbaycan-Ermənistan sərhədlərinin delimitasiyası və təhlükəsizliyi üzrə komissiyanın üçüncü iclası bu gün Brüsseldə keçiriləcək.
Brüssel görüşündə Azərbaycanı nə gözləyir? Delimitasiyası məsələsində Rusiyamı yoxsa Avropa İttifaqı töhfə verə bilər?
Ednews bu barədə politoloqların münasibətini öyrənib.
AzTV-nin İctimai-siyasi proqramlar redaksiyasının baş redaktoru, politoloq Tofiq Abbasov açıqlamasında bildirdi ki, son zamanlar Azərbaycan-Ermənistan qarşıdurması ətrafında Qərblə Şərq çox fəallaşıblar. Onların yeni rəqabət fazası başlayıb.
.jpg)
“Bu rəqabətin kəskinləşməsi yaxşı bir şey vəd etmir. Çünki vasitəçilik örtüyünü gah Rusiya öz tərəfinə, gah da Qərb öz tərəfinə çəkir. Qərb də hərdənbir görürsən ki, haçalanır, yəni Avropa İttifaqı ilə ABŞ-ın baxışları üst-üstə düşmür. Son vaxtlar ABŞ-ın Ermənistana belə bir mesaj verməsi ki, “bəs siz Qarabağı yadınızdan çıxardın, biz sizə kömək edəcəyik”, deməsi yalnız suyu bulandırdı. Biz dərhal Moskvanın reaksiyasını gördük. Moskva da özü-özünü təkzib edir. Bir yandan Putin qeyd edir ki, KTMT bu prosesə qatıla bilməz. Çünki Azərbaycan öz ərazisində əməliyyatlar aparırdı. Digər tərəfdən də deyir ki, Qarabağ məsələsinin statusu gələcək nəsillərə qala bilər. Burada artıq rəsmi Moskvanın riyakarlığını görürük”.
Politoloq Rusiya liderinin Qarabağ məsələsinin həlli barədə danışarkən, məsələnin gələcək zamanda ifadə etməsindən də söhbət açıb.
“Hesab edirəm ki, bu proseslərdə Azərbaycan Prezidenti İlham Əliyevin mövqeyi dəyişməyəcək və dəyişməz olaraq da qalacaq. Ona görə də Ermənistan gərək ki, başına çarə qılsın. Ermənistan ilk növbədə öz siyasətini, öz gücü ilə formalaşdırmalıdır. Belə olmasa, o daim özgələrin yedəyində gedəcək”.
Milli Cəbhə partiyasının sədrinin müavini, siyasi ekspert Məhəmməd Əsədullazadənin sözlərinə görə, Soçi görüşündən dərhal sonra belə bir görüşün Brüsseldə keçirilməsi tərəflərin məhz Moskvaya deyil, Brüssel formatına üstünlük verməsini göstərdi.
“Brüsseldə keçirilən görüşdə müsbət nəticənin əldə olunması gözləmirəm. Çünki Ermənistan tərəfi Azərbaycanı 12-14 senytabr döyüşlərindən əvvəlki mövqelərə geri çəkilməsini tələb edir. Belə olan təqdirdə delimitasiyada probləmlər davam edəcək. Amma, Brüsselin fəal vasitəçiliyi nəticəsində növbəti görüşlərdə irəliləyişə nail oluna bilər”.
M. Əsədullazadə söhbət əsnasında Rusiyadan fərqli olaraq Avropa İttifaqı iki ölkə arasında prosesin irəliləyişinə nail olmağa çalışır.
“Bu da sülhün əldə edilməsini yaxınlaşdıracaq. Vaşinqtonun siyasi dəstəyi və Brüsselin fəal vasitəçiliyi ilə Azərbaycan və Ermənistan liderlərinin Tiflisdə görüşü də mümkündür. Prezident İlham Əliyev ötən ay Gürcüstana səfərində Ermənistan daxil olmaqla üçtərəfli danışıqlar platformasının yaradılmasını təklif etmişdir”.
Oğuz Ayvaz
