Xəbər verdiyimiz kimi, Rusiya prezindenti Vladmir Putin Ermənistana səfər edib. Səfər öncəsi paytaxt İrəvanda etiraz aksiyaları keçirilib. Aksiya iştirakçıları Putin və Lukaşenkonu “Persona non qrata” (“İstənilməyən şəxs”) kimi çağırıblar.
Ednews Putinin Ermənistana səfərininin məqsədini tanınmış politoloqların şərhində təqdim edir.
Politoloq Oqtay Qasımov:
“Vladimir Putinin bu səfəri Rusiya ilə son dövrlər müəyyən gərginliklər yaşayan, xüsusilə də, Qarabağa göndərilmiş Ruben Vardanyan məsələsi baxımından önəm kəsb edir. Digər tərəfdən, Rusiya prezidentinin "Valday" diskusiya klubundakı çıxışı və Rusiyanın bir çox kütləvi informasiya vasitələrində Azərbaycan əleyhinə kampaniyanın təşkil edilməsi və Azərbaycanın ərazi bütövlüyünü şübhə altına alacaq təxribatçı verilişlər və bəyanatlar əlbəttə ki, Azərbaycanla Rusiya arasında müəyyən soyuqlaşmaya və müyyən gərginliyə səbəb olub. Eyni zamanda, bu səfər Azərbaycana müəyyən təzyiq vasitəsi kimi hesab oluna bilər”.
“Bölgədə bundan sonra gərginliyin düşürülməsində müsbət rol oynayacağı ilə bağlı mən çox da optimist deyiləm. Bu səfər sadəcə Rusiya-Ermənistan münasibətlərini, KTMT-ni bağlaya bilər. Digər tərəfdən, Vladimir Putin bu səfərlə Ermənistan tərəfinə həm də müəyyən təzyiqlər göstərməyə çalışacaq ki, ölkə onun təsir zonasından çıxmasın. Necə ki, biz bunun təxminən 8 il öncə şahidi olmuşduq. O zaman Avropa Birliyi ilə yaxın qonşuluq münasibətləri ilə əməkdaşlıq memorandumu imzlamağa hazırlaşan Ermənistana Rusiya tərəfindən edilən ciddi təzyiqlər nəticəsində Ermənistan bu addımından geri dönmüşdü. Bu baxımdan, Putinin Ermənistana səfəri bir çox məqsədlərini həyata keçirən bir səfərdir. Bölgədə gərginliyin azaldılmasına çox böyük fayda verə bilər deyə, mən çox da nikbin deyiləm”.
Politoloq Ramid Hüseynov:
“Rusiya əsrlərə dayanan siyasətini həyata keçirmək üçün Cənubi Qafqazda "erməni kartı"ndan istifadə edib. Nağıllar uyduraraq ermənilərin guya “böyük xalq”, “böyük dövlət” olduğunu onların təfəkkürünə yeritməyə çalışıb. Amma hazırkı situasiyada vəziyyət dəyişməkdədir. Artıq ermənilər başa düşürlər ki, Azərbaycanın qanuni, suveren torpaqlarını işğal altında saxlamaq Ermənistana müsbət gələcək vəd etmir. Bu daha çox Rusiyanın geostrateji maraqlarına xidmət edir.
Paşinyan hakimiyyətinə alternativ olaraq düşünülmüş bu variantla Rusiya erməni əhalisinin rəğbətini yenidən qazanmaq, onları əvvəlki yalanlara, vədlərə inandırmaq istəyir. Rusiya ermənilərin xislətini, məkirli niyyətini, yaltaqlığını yaxşı bildiyindən onları yenidən öz tərəfinə çəkəcəyinə ümid bağlayır. Bununla da Ermənistanda özünə loyal şəxsi hakimiyyətə gətirməklə dövlətin həmişəki asılılığını möhkəmləndirmək, sülh sazişini uzatmaq, vəziyyəti nəzarətində saxlamaq istəyir”.
Oğuz Ayvaz