Xəbər verdiyimiz kimi, Rusiya sülhməramlılarının müvəqqəti nəzarətində olan ərazilərdə faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz olaraq eko-fəallar və QHT təmsilçiləri Şuşa-Laçın yolunda aksiyanı davam etdirir.
Ednews proseslərin gedişatı haqqında politoloqların fikirlərini öyrənib. Cavabları təqdim edirik.
Politoloq Əlimusa İbrahimov açıqlamasında bildirdi ki, Zəngəzur dəhlizinin açılmasında Rusiya tərəfinin Azərbaycandan daha artıq maraqlı olması hamıya məlumdur. Mütəxəssislər bunu Rusiyaya Rusiya-Ukrayna müharibəsi nəticəsində tətbiq olunan sanksiya ilə əlaqələndirirlər. Məlumdur ki, bu üzücü müharibə başa çatdıqdan sonra belə sanksiyalar uzun müddət Rusiyanın üzərindən götürülməyəcək.
“Rusiya bu dəhliz vasitəsi ilə özünü zəruri məhsullarla təmin edəcək. Təbii ki, bu səbəb Rusiyanın Zəngəzur dəhlizinin məhz Azərbaycanın şərtləri çərçivəsində fəaliyyətə başlamasında maraqlı olması üçün yetərlidir. Məlum olduğu kimi 10 noyabr 2020-ci ildə imzalanan üçtərəfli bəyanata əsasən Rusiya Sülhməramlı Kontingenti 2025-ci ildə fəaliyyət müddətini başa vurur. Bu müddətin uzadılması Rusiyanın regionda mövcudluğu üçün həyatı əhəmiyyət daşıyır və Azərbaycanla Ermənistana qarşı ən tutarlı təsir mexanizmidir. Qarabağ torpaqlarının erməni işğalından azad olunmasından sonra Rusiyanı Cənubi Qafqazda möhkəmləndirən ən ciddi arqument onun burada yerləşdirdiyi sülhməramlı kontingentidir.
Politoloq bildirib ki, məhz buna görə də hazırda Kreml sülhməramlıların mandatını əldə etməklə regiondakı mövcudluğunu möhkəmləndirməyə və uzatmağa çalışır. Amma orada artıq hiss edirlər ki, sülhməramlı kontingenti bölgədə beş ildən artıq saxlamaq Rusiya üçün çox çətin olacaq.
“Bəlkə də heç mümkün olmayacaq. Çünki, Azərbaycan tərəfi Rusiya hərbçilərinin sülhməramlı geyimində bölgədə qalmasının müddətini uzatmaqda qəti maraqlı deyil. Sülhməramlılar missiyalarına aid olmayan hər işlə məşğuldur və onların qanunsuz əməlləri barədə sübutlar təqdim etməkdən Azərbaycan tərəfi yorulub. Onlar hazırda az qala Qarabağda ilişib qalan erməni tör-töküntüləri qədər başağrısıdır və Azərbaycana qarşı ikinci cəbhə funksiyası daşıyır”.
Siyasi şərhçi Mübariz Göyüşlünün sözlərinə görə sülhməramlılar səlahiyyət həddini aşır. Ermənilərin ekoloji terroruna göz yumub bizim qarşımızı kəsirlər.
“Haqlı olaraq Azərbaycan QHT təmsilçiləri buna etiraz edirlər. Xankəndi, Xocalı, Ağdərə, Xocavənd Azərbaycan torpaqlarıdır. Biz ora gedə bilərik və gedəcəyik də. Bundan sonra ümumiyyətlə adıçəkilən ərazilərə azərbaycanlılar buraxılmalıdır. Ümumiyyətlə biz bu yerlərin sahibiyik və oradan məcburi köçkün salınan soydaşlarımızı ora qaytarıb məskunlaşma tələbi qoymalıyıq.
Vardanyan, onun əlaltıları olan separatçılar, rus sülhməramlılar Qarabağdan çıxarılmalıdır. Biz Qarabağdakı Azərbaycan vətəndaşı olan ermənilərin təhlükəsizliyini özümüz təmin edərik".
Oğuz Ayvaz
