Hazırda Rusiyada fəaliyyət göstərən istefada olan polkovnik Aleksandr Jilin Qarabağdakı separatçı-terrorçulara başçılıq etmək istəyən Ruben Vardanyana SEPAH-dan dəstək almağı təklif edib. Bundan başqa keçmiş hərbçi ona “Vaqner”in Qarabağa gətirilməsini də məsləhət verib.
Məsələ ilə bağlı Ednews-a danışan politoloq Elşən Manafov bildirib ki, bu sadəcə rusiyalı politoloqun məsələyə təklifidir.
“Təkliflərin qəbul edilib-edilməməsində Qarabağda Dövlət Naziri postunu daşıyan Vardanyanın həmin məsələnin reaksiyasından irəli gələcək. Vardanyanın rusiyalı iş adamı olaraq Rusiya vətəndaşlığından imtina edib Qarabağa gəlməsi, burada qısa zaman kəsiyində məsul vəzifəyə çıxması, eyni zamanda bu gün Qarabağda yaşanan hadisələrdə əsas fiqur olması erməni icmasının etiraz aksiyalarını təşkil etməsi bir daha sübut edir”.
Siyasi analitik həmçinin qeyd edib ki, bu etiraz aksiyaları Vardanyanın ayırdığı maliyyə hesabına təşkil olunur. Onun sözlərinə görə, bütün bunlar təsadüfi sayıla bilməz.
“Şübhəsiz ki , Rusiyada bəlli dairələrə Vardanyanın Dağlıq Qarabağa gəlib bütün bu proseslərdə təşkilatçı rolunda çıxış etməsi maraqlı olacaq. Nəzərə almaq lazımdır ki, Qarabağ istər Rusiya, istərsə də Qərbdə bəlli dairələr üçün Azərbaycan dövlətinə təhdid və təzyiq konteksində düşünülmuş bir layihədir. Bu gün yaşanan hadisələrin fonunda da Vahid Azərbaycan dövlətinin yaradılması da gündəmdən çıxarıla bilməz. Bunu istər Qərb, istərsə də Rusiyanın dövlət orqanları çox gözəl anlayırlar. Vardanyan kimi fiqurlar Azərbaycan dövlətçiliyinin bu layihələrdə tam müstəqil qərarlar qəbul etməsini ləngitmək üçün mövcuddurlar”.
Politoloq qeyd edib ki, Azərbaycanın müharibədə əldə etdiyi qələbə bir daha sübut edir ki, qısa zaman kəsiyində bu dövlət Qarabağda və ərazi bütövlüyünün təmin olunmasında müəyyən addımlar atmaq niyyətindədir.
“Xüsusi dairələr bu addımların qarşısını almaq və ya ləngitmək üçün Vardanyan kimi fiqurlardan istifadə edirlər. İstisna deyil ki, Vardanyan həm də Rusiyada bəlli dairələrin geosiyasi maraqlarına cavabdehdir. Ermənistan hakimiyyətindəki siyasi qüvvələrinin Rusiyaya münasibəti bəllidir. Bu qüvvələrin Qərbin maliyyə dəstəyi ilə hakimiyyətə gəliblər”.
Politoloq son olaraq bildirib ki “Vaqner” Rusiyanın rəsmi güc strukturlarına aid olacaq qurum deyil.
“Bu kimi qruplaşmalara daxil olmaq beynəlxalq hüquq və normaları baxımından nəzərdən keçirilsə terrorçu qruplaşmalar kimi qiymətləndirilə bilər. Çünki “Vaqner”in digər ölkələrdə də Rusiyanın maraqlarına cavab verən hərəkətləri göstərir ki, bu qruplaşma beynəlxalq terrorizmə dəstək verən qurumlardan biridir.
Yəqin ki, bundan sonra da Azərbaycanın son zamanlar atdığı qəti və birmənanlı addımlarının qarşısını almaq üçün bu kimi üsullara əl atacaqlar”.
Bu qruplaşma hələ 2013-cü ildə Suriya döyüşlərində üzə çıxan “Slavyan korpusu” adlı Rusiya muzdlu birləşməsindən qaynaqlanır.
Ayan Rzayeva