“Rusiya əslinə qalsa son 20 ilə baxsaq görə bilərik ki, erməni işğalı altında olan Qarabağın Azərbaycan ərazisi olduğunu hər zaman tanıyıb”.
Bu sözləri rusiyalı politoloq, Rusiyada nəşr olunan Milli Müdafiə jurnalının baş redaktoru İqor Korotçenko Rusiya XİN naziri Sergey Lavrovun son açıqlaması ilə bağlı Ednews-a açıqlamasında deyib.
“Rusiya BMT-də həmişə Azərbaycanın ərazi bütövlüyünü təsdiq edən qətnamələrə səs verib. Ona görə də siyasi və diplomatik səviyyədə Azərbaycan ərazilərinin Ermənistan tərəfindən işğalı faktı həmişə tanınıb. Bu, həllini Rusiya tərəfindən həyata keçirilən faktiki sənədlərdən irəli gəlir”,- deyə, o, əlavə edib.
İ.Korotçenko Rusiya XİN nazirinin “erməniləri işğalçı adlandıraraq, Qarabağın Azərbaycan ərazisi” olduğunu etiraf etməsini belə şərh edib: “Əvvəllər Ermənistana qarşı fərqli siyasi formullardan istifadə olunurdu ki, bu da İrəvanı gərinləşdirmirdi. Bu gün Lavrov artıq kifayət qədər sərt diplomatik ritorikadan istifadə edib. Görünür bu baxımdan Lavrovun davranışı Ermənistan cəmiyyəti üçün müəyyən dərəcədə şok effekti yaradıb. Çünki onlar Moskvanın yumşaq və ehtiyatlı mövqeyinə öyrəşiblər. Amma bu gün, sözü açıq-aydın deməyin vaxtı gəlib çatıb”.
Politoloq həmçinin Rusiyanın neytrallıqdan kənara çıxmasının Paşinyanın Qərbə üz tutması, o cümlədən Fransaya səfəri və regiona digər sülhməramlı missiyaların dəvəti ilə bağlı olub olmadığına da aydınlıq gətirib.
“Birincisi, rəsmi İrəvan son bir neçə ay ərzində müşahidə etdiyimiz bir sıra anti-Rusiya bəyanatları və əməli hərəkətləri ilə xeyli nəzərə çarpıb. Aydındır ki, diplomatiya adətən qıcıqlandıran tərəfə də reaksiya verməyi tələb edir. Təbii ki, Aİ-nin monitorinq missiyasının Ermənistana dəvətləri tamamilə anti-Rusiya hərəkətidir. Oraya təkcə diplomatlar deyil, həm də karyera kəşfiyyatçıları gəldiyinə və əslində bu müşahidə missiyası olmadığına görə onu gələcəkdə Aİ-nin hərbi mövcudluğu formatına çevrə bilən polis-kəşfiyyat missiyası adlandırmaq olar. Ermənistan ərazisində NATO ölkələri "at oynadır" - ən azından proseslər bu gün belə davam edir. İrəvan Rusiyadan getdikcə daha uzaq mövqe tutur, Fransa, ABŞ, Aİ və digər Qərb güc mərkəzləri ilə sıx əlaqələr qurur. Bütün bunlar Moskvada nəzərə alınır. Ona görə də müəyyən qədər demək olar ki, bu, rəsmi Kremlin növbəti dəfə Paşinyana verdiyi mesajdır ki, əvvəlki kimi başqa heç kim erməni maraqlarına xidmət etməklə məşğul olmayacaq. Bu gün külək öz səmtini dəyişir.
Hətta Rusiya Federasiyasının kütləvi informasiya vasitələrində və müxtəlif analitik strukturlarında erməni lobbiçilərinin kütləvi dominantlığına baxmayaraq, bu gün obyektiv tendensiya güclənir. Bu, Rusiyanın ekspert icmasının “qatıq ağdırsa ağdır” prinsipinə geri dönməsi ilə bağlıdır. 2 il əvvəl bir neçə nəfərin Ermənistanın işğalçı olduğunu, Azərbaycanın isə öz ərazilərini azad etdiyini deməsi bu gün Rusiyanın ali siyasi rəhbərliyinin rəsmi ritorikasına çevrilir. Hər halda, Xarici İşlər Nazirliyi hazırda mənim İkinci Qarabağ müharibəsi zamanı baş verən hadisələri şərh edərkən işlətdiyim terminologiyadan istifadə edir. Bu şəxsən məni sevindirir. Belə çıxır ki, ekspert Korotçenkonun tutduğu mövqe bu gün, 2 ildən sonra Rusiya Xarici İşlər Nazirliyi Lavrov tərəfindən götürülür və eyni terminologiyadan istifadə edir. Bir mütəxəssis kimi başa düşürəm ki, mən düzgün yolda olmuşam, vəziyyəti düzgün təhlil etmişəm və bu gün bu, Rusiya Federasiyasının rəsmi mövqeyinə çevrilməkdədir”.
Elnur Ənvəroğlu
