Ermənistan parlamentinin sədri Alen Simonyan bildirib ki, Azərbaycanla sülh müqaviləsində Qarabağla bağlı müddəa olmamalıdır. Simonyan sülh müqaviləsinə dair Ermənistan tərəfinin Azərbaycana təqdim etdiyi təkliflərə rəsmi Bakının reaksiyasına bələd olmadığını deyib.
Simonyanın fikirlərini Ednews-a şərh edən politoloq Cümşüd Nuriyev qeyd edib ki, Azərbaycan Qarabağ məsələsinin sülh müqaviləsinə salınmasının, ümumiyyətlə, bunun Ermənistan və digərləri ilə müzakirə edilməsinin tərəfdarı deyil.
“Qarabağ Azərbaycan ərazisidir, bizim başqa dövlətlə öz ərazimiz haqda danışmağımız, bununla əlaqəli hansısa sənəd imzalamağımız mümkünsüzdür. Azərbaycan qanunları da buna imkan vermir. Azərbaycan Konstitusiyasına uyğun olaraq, Prezident İlham Əliyev dəfələrlə bəyan edib ki, Qarabağ məsələsi bizim daxili işimizdir. Bəli, biz Qarabağda yaşayan erməni əsilli Azərbaycan vətəndaşları ilə əlaqə saxlayaraq onlarla iş görmək istəyirik, bunu edə bilərik, amma bu o demək deyil ki, bu əlaqələri başqa müstəvidə gündəmə gətirəcəyik və ya gətiririk”.
Siyasi analitik hesab edir ki, əgər Simonyan, Mirzoyan və digər erməni rəsmiləri ağıllanırlarsa, demək, ermənilər yavaş-yavaş düzəlirlər. Paşinyanı başa düşürəm, gah elə danışır, gah da belə. Onun da ağılsız danışıqları çoxdur. Onlar dərk etməlidirlər ki, Hitler kimi bir adam müharibəni uduzursa və bunun şərtlərini qəbul edirsə, Paşinyanın da bunu qəbul etmək məcburiyyətindədir. Ara qarışdırmaqla məsələlər həll olunmur.
“Artıq Ermənistan rəhbərliyi Azərbaycanın bu haqlı tələbini başa düşür və qəbul etməyə başlayıb. Əgər bir Ermənistan rəsmisi belə deyirsə, bu o deməkdir ki, Azərbaycan aparılan danışıqlarda öz milli maraqlarına sadiqdir. Kimisə aşağılamaq istəmirəm, amma qələbə qazanan tərəf də, şərtləri və qaydaları müəyyən edən də Azərbaycandır. Biz beynəlxalq hüquq məsələsini gündəmə gətirmişik. Bunu görəndən sonra da Simonyan ayrı söz deməməlidir”.
Sonda C.Nuriyev əlavə edib ki, Ermənilərin xarici siyasətində sabitlik yoxdur, həm də həddən artıq mövqesizlik var. Eyni zamanda, Qarabağ yükündən qurtulmaq istəyirlər.
“Amma bu yükdən necə xilas olacaqlarını bilmirlər. Ona görə də çox vaxt diplomatiyadan uzaq çərçivədə danışırlar. Təbii ki, Azərbaycan öz erməni əsilli vətəndaşları ilə əlaqə qurmalıdır və quracaq da. Azərbaycan qanunlarında və Konstitusiyasında vətəndaşlarımıza hansı hüquqlar və səlahiyyətlər verilirsə, yaxud Gəncədə, Sumqayıtda və Bakıda yaşayan 40 mindən çox erməni hansı səlahiyyətlərə malikdirlərsə, o ermənilər də bunlara sahib olacaqlar. Artıq bunu başa düşməyə başlayıblar”.
Oğuz
