Xəbər verdiyimiz kimi, İsveçrə parlamentinin üzvü Nik Quqqerin seçki ilə bağlı Bakıya gəlib. Polis onu hava limanında yoxladıqdan sonra İstanbul reysi ilə geri göndərib. Nik Quqqerin bir müddət əvvəl AŞPA-da Azərbaycan əleyhinə çıxış edib. Daha əvvəl isə Qarabağ məsələsinə görə Ermənistana dəstək nümayiş etdirib.
Məsələ ilə bağlı Ednews-a açıqlamasında politoloq Tural Əliyev bildirdi ki, ATƏT-in digər müşahidəçilərinin, o cümlədən İsveçrə nümayəndə heyətini Bakıya buraxılması o deməkdir ki, burada təşkilata qarşı qərəzdən söhbət gedə bilməz:
“Nik Quqqer həm də AŞPA-da deputat kimi təmsil olunur, Azərbaycana qarşı dəfələrlə çıxış edib, Qarabağda Azərbaycanın haqq davasını, müstəsna suveren hüququnu görməzdən gəlib. Anti-Azərbaycan mövqeyi ilə tanınır, ermənipərəst olmağı bir tərəfə, Azərbaycanı işğalçı dövlət kimi tanıtmağa yönəlik "fəaliyyət" göstərib. Rəsmi Bakı dəfələrlə beynəlxalq təşkilatlara, dövlətlərə müraciət ünvanlayıb ki, Azərbaycanın suverenliyini təhdid yaradan siyasətçilərə beynəlxalq hüquq çərçivəsində cavab tədbirləri görəcəkdir. Nik Quqqerin şəxsinə heç bir kobudluq göstərilməyib, sadəcə siyasətçi olaraq erməni yalan maşınına inanıb, heç bir araşdırma aparmadan Azərbaycana qarşı kampaniyanın bir parçası olduğuna görə konvensiyalara uyğun müvafiq addım atılıb. Bu, həmçinin digər qərəzli yanaşan avropalı siyasətçilərə də mesajdır, çıxışlarında Azərbaycanın beynəlxalq səviyyədə tanınmış sərhədlərinə hörmət etsinlər”.
Oğuz