Prezident seçkilərinin ardınca bu ilin payızında Azərbaycanda parlament seçkilərinin keçirilməsi gözlənilir. Bu fonda parlamentdə təmsil olunmağı hədəfləyən siyasi partiyaların artıq lazımi tədbirlərə start verməsi hərçənd zəruri görünür.
Xatırladaq ki, eyni zamanda ilin sonunda COP-29 tədbiri də keçiriləcək və bu tədbirin keçirilməsi iddia olunan seçkilərə təsir edə bilərmi? Ümumiyyətlə, hazırlıqlar gedirmi və seçkilər nisbətən erkən ola bilərmi?
Ednews məsələ ilə bağlı partiya sədrləri arasında sorğu keçirib:
Azərbaycan Demokratik Partiyasının sədri Sərdar Cəlaloğlu:
“Əvvəla onu deyim ki, ölkədə seçkilərə əvvəlki illərdən fərqli olaraq ciddi bir siyasi iradə nümayiş etdirilmir. Ona görə də düşünürəm ki, növbəti seçkilər elə əvvəlki illərdəki kimi olacaq. Eyni zamanda ölkədə həm nəhəng, beynəlxalq tədbirin keçirilməsi, həm də parlament seçkiləri kimi seçkilərin keçirilməsi müəyyən mənada seçkilərin normal keçirilməsi bu və ya başqa şəkildə mənfi təsir edəcək. Ümumiyyətlə, siyasət sahəsində belə bir söz var, bir seçki qurtardısa, digər seçki başlayır. Açığı deyim ki, qarşıdan gələn parlament seçkilərinə böyük ümidlər bəsləmirəm. Faktiki olaraq Azərbaycanda indiki durğunluq dövrünün bir müddətdə davam edəcəyini proqnozlaşdırıram”.
Respublikaçı Alternativ Partiyasının icraçı katibi Natiq Cəfərli:
“Real Partiyası bu ilin yanvar ayında parlament seçkilərinə hazıqlıq çərçivəsində seçki qərargahı təsis etdi. Siyasi Komitənin üzvü, Vəkillər Kollegiyasının üzvü, tanınmış vəkil Rəsul Cəfərov həmin qərargahın rəhbəri təyin edildi. Həmin qərargahda təqribən siyasi komitənin üzvlərini də saysaq 15-20 nəfər təmsil olunur. Onlar tədbirlər planını hazırlayırlar. Artıq bəzi tədbirlər də keçirilir. Dairələrin dəqiqləşdirilməsi, seçicilərlə iş planı – bütün bunlar artıq işçi rejimdə görülür. Mən belə başa düşürəm ki, REAL yeganə partiyadır ki, artıq seçki qərargahı yaradıb və seçki hazırlıqlarına start verib. Amma bir məchul var hələ. Parlament seçkilərinin vaxtı ilə bağlı hələ müxtəlif versiyalar səsləndirilir. COP-29 zamanı parlament seçkilərinin keçirilməsi o qədər də ağlabatan görünmür. Ona görə də ola bilər ki, vaxtı dəyişdirilsin. Bundan öncə referendumun olması ehtimalı da var. Bundan başqa paralament seçkilərinin hansı seçki sistemi üzrə keçiriləcəyi də dəqiq deyil. Tarixlərlə bağlı məlumatımız tam deyil. Çünki hakimiyyətin verəcəyi qərarlardır”.
Ağ Partiya sədri Tural Abbaslı:
“Növbədənkənar parlament seçkilərinin keçirilməsi məsələsi çoxdan gündəmdədir. Artıq Konstitusiyanın tələbi olunan müddət yaxınlaşır. Çünki Konstitusiyaya görə növbədənkənar parlament seçkiləri keçirilibsə, növbəti seçkilər 5-ci ilin noyabr ayının ilk bazar günü keçirilməlidir. Buda düşür 2024-cü ilin noyabr ayının 3-nə səhv eləmirəmsə. Və həmin müddətdə artıq seçki keçirilməlidir. Yəni Konstitusiyanın tələbi budur. Qeyd elədiyiniz kimi noyabr ayında COP29 tədbiri var eyni zamanda səhv eləmirəmsə noyabr-dekabr aylarına bələdiyyə seçkiləridə düşür. Yəni bu qədər qarışıqlıqda parlamet seçkilərinin keçirilməsi biraz məntiqli görsənmir. Çünki parlament seçkiləri elə bir seçkilərdirki, burda iştirakçılarının sayı ən kütləvi və ən aktiv dönəm olur. Bələdiyyə seçkilərində çox namizəd olur amma orada o qədərdə rəqabət olmur. Parlament seçkilərində hər bələdiyyə üzrə demək olarkı, iki üç namizəd kompaniya aparır və həmin dairədə seçkilər xeyli aktiv keçirilir. Mən düşünürəmki yəqinki noyabr ayına qədər seçkilər keçiriləcək. Nə vaxt necə hansı formada- bu barədə demək qeyri ciddi olardı. Çünki hakimiyyətin planlarıdı, hesablamalarıdı hansıkı biz bu barədə deyə bilmərik. Bir daha qeyd edimki əgər noyabrın 3-də olmayacaqsa parlament yenə növbədənkənar keçirilməlidir. Tutaq ki, sentyabrda oktybarda keçirilsə belə parlament prosedura görə yenə buraxılmalıdır və yaxudda özünü buraxçalıdır və yenidən seçki keçirilməlidir. Partiya olaraq biz təbbiki hazırlaşırıq yəni 2024 cü ildə parlament seçkiləri olcağını hamımız öncədən təxmin etmişdik. Prezident seçkiləri gözlənilməz oldu və ona görədə biraz prezident seçkilərində demək olarkı biraz gözlənilməzliklər baş verdi. Parlament seçkilərində bir çox partiyalar hazırlaşır eyni zamanda biz də hazırlaşırıq. Hazırlıq mərhələsində namizədlərin müəyyən olunması dairələrin namizədlər üzrə müəyyən olunması müşahidəçilərin müəyyən olunması şüaarların müəyyən olunması regionlar üzrə namizədlərin müəyyən olunması digər partiyaların namizədlərinin dəqiqləşdiriməsi. Və bu kimi müxtəlif addımlar atılır və bizdədə bu proses başlıyıb. Yəni Ağ partiya öz namizədlərini istər idarə heyətində istər regionalardan öz namizdədlərini daxildə müəyyənləşdirməyə çalışır. Yəni müşahidələrin aparılması seçkinin təşkil olunması və.s, bir sözlə hazırlaşırıq. Yenə ehtimal edirikki noyabra qədər keçiriləcək və çalışacayıqki Ağ partiya ən aktiv iştirak edən və ən çox təmsil olunan partiya olsun. Amma bunu zaman göstərəcək”.
Əkbər Novruz
