Bu gün Azərbaycanda milli bayram olan 28 May – Müstəqillik Günü qeyd olunur. 106 il əvvəl Şərqdə ilk demokratik respublika qurulub. Azərbaycan Xalq Cümhuriyyətinin (AXC) qurulması 28 may 1918-ci ildə Tiflis şəhərində Qafqaz canişininin binasında Məhəmməd Əmin Rəsulzadənin sədri olduğu Azərbaycan Milli Şurası tərəfindən bəyan edilib.
Bu münasibətlə Beynəlxalq Avrasiya Mətbuat Fondunun prezidenti Umud Mirzəyev Ednews-a açıqlamasında bildirdi ki, 28 may Azərbaycan xalqının tarixində çox önəmli bir gündür. Bu gün müstəqil Azərbaycan Respublikasının təməlinin qoyulduğu gündür:
“Müstəqilliyimizin yaranması Birinci Dünya müharibəsinin sona çatması və Rusiya çarlığının çökməsi ilə əlaqədardır. Ümumiyyətlə, bu müharibədən sonra dünya xəritəsi dəyişilməyə başladı. Böyük imperiyaların, həmçinin Çar Rusiyasının çökməsinə səbəb oldu. Rusiyada bolşeviklər çevriliş etdilər. Bu fürsətdən istifadə edən demokratik qüvvələr Cümhuriyyəti elan etdi. 1918-ci il mayın 27-də Zaqafqaziya Müsəlman Şurası özünü Azərbaycan Milli Şurası elan etdi. Bununla da, əslində Azərbaycanın tarixində parlamentli respublikanın bünövrəsi qoyulmuş oldu. Həmin iclasda Azərbaycan Milli Şurasının rəyasət heyəti və sədri seçildi. Mayın 28-də Azərbaycan Milli Şurasının iclasında İstiqlal Bəyannaməsi qəbul edildi”.
U.Mirzəyev qeyd etdi ki, Cümhuriyyətimiz çox az müddət mövcud olsa da, bu müddət ərzində çox böyük işlər görüldü:
“Cümhuriyyət dövrü, Azərbaycan xalqının müstəqillik arzusunun alovlanmasına təkan verdi, milli kimliyin dərk edilməsinə gətirib çıxardı. Bundan sonra ilk dəfə olaraq rəsmi qaydada üçrəngli bayrağı Ulu öndər Heydər Əliyev Naxçıvan Muxtar Respublikasının Ali Məclisinin sessiyasında rəsmi dövlət bayrağı kimi qaldırıb. Bununla da müstəqilliyə gedən yolun əsası qoyulub. Sovet İttifaqı mövcud olduğu bir vəziyyətdə belə cəsarətli addımın atılması Ulu Öndərin xalqına, dövlətinə nə qədər bağlı olduğunu, bu yolda nə qədər cəsarətli, dönməz olduğunu bir daha göstərdi.
Müstəqillik ideyalarımız cümhuriyyətdən qaynaqlanır. Sovet dövründə bu günü nəinki qeyd etmək, hətta dilə gətirmək belə qadağan idi. SSRİ dağıldıqdan və Respublikamız müstəqllik qazandıqdan sonra biz Cümhuriyyəti quran şəxslərin necə əziyyət çəkdiklərini anladıq. Çox ziddiyətli bir dövr idi. Bütün hallarda həmin dövrdə bir fundament, bünövrə qoyulmuşdu. Azərbaycan məhz o dövrün ənənələrindən çıxış edərək ordusunu gücləndirdi və torpaqlarını işğaldan azad etdi. 100 il əvvəl olduğu kimi yenə də Azərbaycan torpaqlarına göz dikən qüvvələr oldu. Lakin Ulu öndərin siyasəti ilə Azərbaycan öz bütövlüyünü bərpa etdi. Bu gün Azərbaycan regionda söz sahibi olan, iqtisadi gücü olan, günü gündən inkişaf edən bir ölkəyə çevrilib”.
Oğuz
