Makronun Azərbaycanla bağlı jurnalistlərlə mübahisəsi bu gün Oksforddakı mətbuat konfransında baş verdi. Makrona Cənubi Qafqaz regionunda Ermənistanı hücum edici ölümcül silahlarla silahlandırmağın məqsədi nə olduğunu soruşdular.
Ednews xəbər verir ki, Makron suala bu fikirlərlə cavab verib:
"Baxın, düşünürəm ki, biz hamımız müharibədən qaçmaq üçün silahlanırıq. Son onilliklərə baxsanız, görünür ki, Azərbaycan Ermənistandan çox silahlanıb. Əgər yaddaşım məni yanıltmırsa, düzəldin məni, əgər yanılırsam, Azərbaycan həqiqətən də 2020-ci ildə dəhşətli bir müharibə başladı."
Ona etiraz edərək Qarabağ regionunun Azərbaycanın beynəlxalq səviyyədə tanınan ərazisi olduğunu bildirdilər.
"Müzakirə apara bilərik. Amma, mən düşündüm ki, bu mətbuat konfransıdır. Müttəfiqlər və tərəfdaşlar üçün silah, sursat göndərmək və əraziləri müdafiə etmək üçün hazırlamaq normaldır, necə ki, biz bir çox digər Avropa ölkələri ilə belə edirik. Və mən heç vaxt baş nazir [Paşinyan] tərəfindən hər hansı bir müharibə və ya təcavüz planının olduğunu eşitmədim," – dedi Makron.Daha sonra Makron, Azərbaycanın "sərhədin bəzi hissələrini ələ keçirdiyini" və Ermənistanın "sülhpərvər" siyasətini qeyd edərək köhnə pro-erməni fikirlərini səsləndirdi:"Ermənistanın perspektivi – sülh. Fransanın perspektivi – sülh. Ümid edirəm ki, Azərbaycanın perspektivi də sülhdür. Və əgər iki ölkə sülh müzakirələrini başa çatdırarsa, biz belə bir müqaviləni dəstəkləyəcəyik."
Təəssüf ki, Fransa Prezidenti Emmanuel Makronun Avropa Siyasi İcmasının Zirvə toplantısında Ermənistanın hərbiləşdirmə siyasətinə haqq qazandıran və Azərbaycana qarşı açıq qərəzli mövqe nümayiş etdirən fikirləri Fransanın regionda gərginlik yaratmaq və sülh prosesinə mane olmaq cəhdlərinin daha bir bariz nümunəsidir.
Fransa tərəfinə xatırladırıq ki, Azərbaycanın suveren ərazilərində Ermənistanın 30 il davam edən işğalına son qoymaq, Azərbaycanın suverenliyini və ərazi bütövlüyünü bərpa etmək üçün apardığımız müharibə ölkəmizin beynəlxalq hüquq çərçivəsində legitim hüququ idi. Azərbaycanın istənilən səyi, o cümlədən hərbi potensialının gücləndirilməsi ədalətli məqsədə yönəlib və yönəlməkdədir. Lakin, bunu işğalçı dövlət olan Ermənistana münasibətdə söyləmək olmaz.
30 ilə yaxın Azərbaycan ərazilərini işğal altında saxlayan, bir milyona yaxın azərbaycanlını öz doğma yurd-yuvasından didərgin salmış, kütləvi qırğınlar və insanlığa qarşı cinayətlər törətmiş Ermənistanın Fransa tərəfindən sülhsevər ölkə kimi təqdim etməsi bu ölkənin həm vasitəçilik dövründə, həm də 44 günlük vətən müharibəsindən sonra apardığı siyasətin nə qədər ədalətsiz olduğunu nümayiş etdirir.
Onu da xatırlatmaq istərdik ki, münaqişənin sülh yolu ilə həllinə töhfə verməyən, Ermənistanın Azərbaycan ərazilərinin işğalına son qoymağın qarşısını alan məhz Fransa kimi dövlətlərin Ermənistanın 30 ilə yaxın müddətdə təcavüzünü ört-basdır edən siyasəti olub.
Qeyd olunanları nəzərə alaraq bir daha bildiririk ki, Fransanın sülhə xidmət etməyən və regionda sabitliyi pozan səyləri heç bir nəticə verməyəcək.
Fərid Axund
