Azərbaycan Ermənistanı COP29 İqlim sammitinə dəvət edib. Bu barədə Azərbaycan Prezidenti İlham Əliyevin xarici siyasət məsələləri üzrə müşaviri Hikmət Hacıyev Şuşada jurnalistlərə açıqlamasında deyib. Bəs rəsmi İrəvan, Bakının iştirak dəvətini qəbul edəcək?
Siyasi elmlər doktoru və millət vəkili Elşad Mirbəşiroğlu mövzu ilə bağlı fikirlərini Ednews - a bölüşüb. Onun fikrincə bu dəvət, Azərbaycanın sülh gündəliyinə olan sadiqliyini nümayiş etdirir:
"Bu bir daha onu göstərir ki, Azərbaycan öz sülh gündəliyində bütün addımlarında olduğu kimi tam səmimidir. Baxmayaraq ki, ölkəmizin Ermənistanla rəsmi əlaqələri yoxdur, lakin yenə də rəsmi Bakı Ermənistan Xarici İşlər Nazirliyinə dəvət məktubu göndərib. Bu həm də bir beynəlxalq icmaiyyət üçün növbəti mesajdır. Göstərir ki, biz regionda sülhün, əməkdaşlığın təmin edilməsinin tərəfdarıyıq.
"Bu həm də onu təsdiq edir ki, Azərbaycan – Ermənistan arasında münasibətlərin tənzimlənməsinin yeganə təşəbbüskarı Azərbaycan və onun prezidentidir. Biz bir daha nümayiş etdirdik ki, bu sülh gündəmini biz başlatmışıq və həmin günədəmi də irəli aparmaq niyyətindəyik. Sülh gündəliyində tam səmimiyik. Bundan sonra isə artıq qərar Ermənistan tərəfindədir. Artıq İrəvan sülh ritorikasında səmimi olub olmadığını qərarı ilə nümayiş etdirəcək".
Əkbər Novruz
