Baku TV-nin "Global Panorama" verilişinin yeni buraxılışı yayımlanıb.

Proqramın budəfəki buraxılışında Azərbaycan və Ermənistan xarici işlər nazirlərinin IV Antalya Diplomatiya Forumu çərçivəsində baş tutan görüşündən bəhs olunub.

Bildirilib ki, Ceyhun Bayramov və Ararat Mirzoyanın masaya oturmasında məqsəd konkret müzakirələrin edilməsi idi:

"Sülh sazişi, dövlətlərarası münasibətlərin qurulması və danışıqların davamına hazırlıq. Burada rəsmi Bakı növbəti dəfə mesajını aydın verdi. Biz dialoqa açığıq, amma açıq qapıdan keçmək üçün qarşı tərəf səmimi olmalıdır. Qısası, sülh istəyiriksə, bu, sadəcə protokol yox, real siyasi iradə tələb edir".

Qeyd edilib ki, nazirlər eyni zamanda Gürcüstan XİN rəhbəri Maka Boçorişvili ilə birlikdə Cənubi Qafqazda regional əməkdaşlıq üçün çağırışlar və imkanlar panelində iştirak ediblər:

"Panel təkcə siyasi analizlər yox, həm də incə diplomatik söz oyunu ilə yadda qaldı. Ceyhun Bayramov bildirib ki, əgər Ermənistan Azərbaycana qarşı ərazi iddialarından imtina edərsə, sülh müqaviləsinə heç bir maneə qalmaz. Ararat Mirzoyan isə cavabında dedi ki, sülh sazişi ilə ATƏT-in Minsk qrupunun ləğvi haqqında sənəd eyni gündə 10 dəqiqə fərqlə imzalana bilər. Üslub diplomatik, amma mesaj aydın idi. İndi məsələ imzada yox, iradədədir. Ceyhun Bayramov açıq şəkildə dedi ki, Ermənistan Konstitusiyasında Azərbaycana qarşı ərazi iddiası var və bu dəyişmədikcə sülh sazişinin hüquqi qüvvəsi də sual altında qalacaq".

Fatimə Şükürova // EDnews