Ağ Ev lideri Donald Tramp ABŞ-nin İrana qarşı apardığı hərbi əməliyyatların gedişindən narazılığını bildirir və münaqişənin həddindən artıq uzandığını hesab edir.
EDnews xəbər verir ki, bu barədə CBS telekanalı çərşənbə günü öz mənbələrinə istinadən məlumat yayıb.
"İrana qarşı hərbi kampaniya uzandıqca və fevral ayında müharibə başlayarkən gözləniləndən daha mürəkkəb xarakter aldıqca, Trampın məyusluğu getdikcə artır", - deyə nəşrdə qeyd olunub.
Telekanalın mənbələrinin sözlərinə görə, İranla müharibə Tramp və ABŞ-nin hərb naziri Pit Heqset arasında bəzi fikir ayrılıqlarını üzə çıxarıb. Materialda qeyd olunub ki, Tramp prezidentliyinin ikinci müddətində Heqsetə və müxtəlif hərbi əməliyyatlara dəfələrlə yüksək qiymət versə də, şəxsi söhbətlərində "Epik qəzəb" əməliyyatının gedişatından narazı olduğunu bildirib. Kanalın məlumatına əsasən, Tramp düşünür ki, rəsmi Vaşinqton bu ilin əvvəlində İranın nüvə proqramını məhdudlaşdırmaq təklifini rədd etməklə uzanan münaqişənin qarşısını almaq fürsətini əldən verib.
ABŞ rəsmiləri olan mənbələrin bildirdiyinə görə, ABŞ Silahlı Qüvvələrinin Qərargah Rəisləri Komitəsinin sədri Den Keynin münaqişə ilə bağlı narahatlıqlarını ifadə etməsinə baxmayaraq, Heqset İrana qarşı daha sərt yanaşmaya çağırırdı. Mənbələr onu da əlavə ediblər ki, Pentaqonun və digər Amerika qurumlarının bəzi nümayəndələri həmçinin ABŞ Silahlı Qüvvələrinin Mərkəzi Komandanlığının rəhbəri, admiral Bred Kuperdən narazı idilər, çünki onun ordunun İrana qarşı mübarizə imkanlarını şişirtdiyini hesab edirdilər.
