Şuşa Qlobal Media Forumu beynəlxalq media nümayəndələrinin bir araya gəldiyi, qlobal informasiya gündəliyinin aktual məsələlərinin müzakirə olunduğu mühüm platformalardan biridir. Forum, eyni zamanda, Azərbaycanın və Qarabağın həqiqətlərinin dünya ictimaiyyətinə çatdırılması, media diplomatiyasının gücləndirilməsi, dezinformasiya və saxta xəbərlərlə mübarizə istiqamətində fikir mübadiləsinin aparılması baxımından xüsusi əhəmiyyət daşıyır.

EDnews AK Partiyanın İstanbul Vilayət Təşkilatının sədr müavini, Türk Dövlətləri ilə Əlaqələr Şöbəsinin rəhbəri Mehmet Şahının bu barədə fikirlərini öyrənib. 

– IV Şuşa Qlobal Media Forumunu və onun əhəmiyyətini necə qiymətləndirirsiniz?

– Şuşa Qlobal Media Forumu qardaş Azərbaycanın qısa müddət ərzində beynəlxalq media diplomatiyası sahəsində nə qədər güclü iradə nümayiş etdirdiyinin ən bariz göstəricilərindən biridir. Bu il dördüncü dəfə keçirilən forum 13-14 iyul 2026-cı il tarixlərində “Medianın sülhü təşviq etmək missiyası: Həqiqəti yenidən üzə çıxarmaq və etimadı bərpa etmək” mövzusu ilə 53 ölkədən 160-a yaxın iştirakçını bir araya gətirib.

Bir vaxtlar işğal altında olan Şuşanın bu gün qlobal media gündəminin mərkəzlərindən birinə çevrilməsi özlüyündə tarixi mesajdır. Azərbaycan Prezidenti cənab İlham Əliyevin şəxsən iştirakı ilə keçirilən bu forum “Bir millət, iki dövlət” anlayışı çərçivəsində qardaşlığımızın yalnız siyasi deyil, həm də mədəni və kommunikasiya sahələrində necə dərinləşdiyini göstərir. Türkiyə olaraq Azərbaycanın bu uzaqgörən addımını ürəkdən dəstəkləyir və bununla qürur duyuruq.

– Türk dünyasında dezinformasiya və saxta xəbərlərlə mübarizə üçün ortaq media platformasına ehtiyac varmı?

– Şübhəsiz ki, belə bir ehtiyac var və bu, artıq təxirə salına bilməyəcək zərurətə çevrilib. Türk dünyası ortaq tarixi, dili və sivilizasiya kökləri ilə geniş bir mənəvi coğrafiyanı əhatə edir. Lakin bu coğrafiyaya yönələn informasiya axını çox vaxt kənardan, bizim dəyərlərimizi və həqiqətlərimizi nəzərə almayan gündəmlər əsasında formalaşdırılır. Dezinformasiya da məhz bu boşluqdan istifadə edərək yayılır.

Türk Dövlətləri Təşkilatı çərçivəsində bu istiqamətdə güclü institusional iradə artıq ortaya qoyulub. Bu gün ehtiyac duyduğumuz əsas məsələ həmin iradəni praktik müstəvidə dəstəkləyəcək ortaq məlumat yoxlama və əməkdaşlıq infrastrukturunun yaradılmasıdır. Bu, hər bir ölkənin suverenliyini vahid mərkəzə həvalə etdiyi struktur olmamalıdır. Əksinə, müstəqil media qurumlarımızın bir-biri ilə əlaqə yarada bildiyi, ortaq doğrulama mexanizmləri formalaşdırdığı həmrəylik modeli olmalıdır. Forumda media təlimlərinin, qurumlararası əməkdaşlığın və dezinformasiya ilə birgə mübarizənin əsas prioritetlər kimi önə çıxması da bu ehtiyacı bir daha təsdiqləyir.

– Forumun Azərbaycan və Qarabağ həqiqətləri barədə beynəlxalq informasiya məkanında məlumatlılığın artırılması baxımından əhəmiyyəti nədən ibarətdir?

– Bu, forumun bəlkə də ən dəyərli töhfələrindən biridir. Beynəlxalq media nümayəndələrinin birbaşa Şuşada qəbul edilməsi uzun illər təhrif olunmağa çalışılan həqiqətlərin yerində və canlı şəkildə görülməsinə imkan yaradır. Qarabağ işğaldan azad edildikdən sonra həmin ərazilərdə aparılan yenidənqurma və dirçəliş prosesini dünyaya ən təsirli şəkildə məhz bu cür təmaslar vasitəsilə çatdırmaq mümkündür.

İndiyədək keçirilən forumlarda 81 ölkədən təxminən 600 media nümayəndəsinin Şuşada bir araya gəlməsi bu istiqamətdə formalaşan məlumatlılığın ildən-ilə artaraq böyük təsir gücünə çevrildiyini göstərir. Birtərəfli yanaşmaların və ədalətsiz təbliğatın ən təsirli cavabı məhz hadisə yerində qurulan səmimi və dürüst təmaslardır. Azərbaycan bu forum vasitəsilə yalnız öz haqlı mövqeyini deyil, eyni zamanda sülh, media diplomatiyası və etimadın qurulması kimi ümumbəşəri dəyərləri də dünyaya çatdırır.

– İstanbul dünyanın, eləcə də Türk dünyasının ən mühüm şəhərlərindən biridir. Partiyanız adından bu istiqamətdə həyata keçirdiyiniz fəaliyyətlər barədə məlumat verə bilərsinizmi?

– İstanbul sivilizasiyamızın paytaxtı, Türk dünyasının isə mənəvi mərkəzidir. AK Partiyanın İstanbul Vilayət Təşkilatı olaraq Türk dünyası ilə əlaqələri partiyamızın ən prioritet gündəm istiqamətlərindən biri hesab edirik. Prezident cənab Rəcəb Tayyib Ərdoğanın liderliyi ilə dövlətimizin ortaya qoyduğu güclü vizyonu İstanbulda vətəndaş cəmiyyəti və ictimai müstəvidə daha da möhkəmləndirmək üçün fəaliyyət göstəririk.

Aytac Kərimova | EDnews