Moskvanın əsas hava limanlarında tətbiq edilən müvəqqəti uçuş məhdudiyyətləri aradan qaldırılıb.

“EDnews” xəbər verir ki, bu barədə Rusiya Mülki Aviasiya Agentliyindən (Rosaviatsiya) xəbər verilib.

"Vnukovo, Domodedovo, Jukovski və Şeremetyevo hava limanlarında hava gəmilərinin qəbulu və buraxılışı üzərindəki məhdudiyyətlər aradan qaldırılıb", - deyə qurumdan bəyan edilib.

Qeyd edək ki, dünən gecədən etibarən Moskvadakı bütün əsas hava limanlarında uçuşların qəbulu və göndərilməsinə məhdudiyyət qoyulub. Buna səbəb Rusiya paytaxtı yaxınlığında vurulan çoxsaylı pilotsuz uçuş aparatları (PUA) olub.

Məhdudiyyətlər Şeremetyevo, Domodedovo, Jukovski və Vnukovo hava limanlarında tətbiq olunub. Bundan əlavə, Kaluqa, Vladimir, Yaroslavl, Kostroma və İvanovo şəhərlərinin aeroportlarında da uçuşlara məhdudiyyətlər qüvvəyə minib.

Moskva meri Sergey Sobyanin bildirib ki, ötən gecə paytaxt yaxınlığında ümumilikdə 27 pilotsuz uçuş aparatı vurulub.

Qeyd edək ki, mayın 27-də Ukrayna Prezidenti Volodimir Zelenski Rusiya hücumlarına cavab tədbirlərinin planlaşdırılması məqsədilə hərbi komandanlıqla müşavirə keçirib. Bu barədə o, axşam saatlarında videomüraciətində bildirib.

Zelenskinin sözlərinə görə, müşavirədə Ukrayna Silahlı Qüvvələrinin baş komandanı Aleksandr Sırski, Baş Qərargah rəisi Andrey Qnatov və müdafiə naziri Rustem Umerov iştirak ediblər.