Ermənistanın Baş naziri Nikol Paşinyan hökumətin bugünkü iclasında sabiq xarici işlər naziri Vardan Oskanyana da daş atıb.

“EDnews” xəbər verir ki, Paşinyan Vardan Oskanyanın quldur və rüşvətxor olduğunu vurğulayıb.

“Hökumətin əvvəlki iclaslarının birində Dilican uşaq bağçasının keçmiş məmurun ailəsi - arvadı ilə bağlı olduğunu dedim və hesab etdim ki, bu, Nazirlər Kabinetinin iclası olduğuna görə əlavə nəsə söyləməyə ehtiyac yoxdur...
Amma sonra əlinə xəncər alan həmin eks-məmur bizim haqqımızda bəzi hədyanlar yazmağa başladı. Bu da Xarici İşlər Nazirliyinin keçmiş rəhbəri Vardan Oskanyandır”.

Paşinyanın sözlərinə görə, son zamanlar mətbuat onun qızına kollec binası verildiyini yazır ki, bu da Vardanyan, Köçəryan və digərlərinin sifarişi ilə edilir: “Bunların bir vəzifəsi var - bizim də onlar kimi olduğumuzu göstərmək”.

Paşinyan Vardan Oskanyanı və onunla bir sırada duranları əclaf, quldur adlandırıb.

“Onlar əclaf olduqlarını gizlətməyə belə cəhd etmirlər. İndi onların başqa məqsədi var - baş nazirin də onlar kimi olduğunu göstərmək. Deyirlər, baş nazir Fransada üç milyon avroya ev alıb. Fransada bir-iki daşnak var, həftədə 3 avroya sayt açıb orda hər cür şeylər yazırlar”.

Paşinyan Ermənistanın ikinci prezidenti Robert Köçəryanın rüşvətxor olduğunu vurğulayıb

“Ermənistan Respublikasının məhkəmə sistemində ikinci prezident vəzifəsini tutan şəxsin rüşvətxor olduğu rəsmən qeydə alınıb. Razı deyilsə, məhkəməyə müraciət etsin. Bundan sonra mən çıxış edib Robert Köçəryanın adını açıqlayanda deyəcəyəm - rüşvətxor Robert Köçəryan.

Hər şeyin bir həddi var. Yunanıstanda adası olduğunu inkar etmirlər, artıq özlərini müdafiə edə bilmirlər və göstərmək istəyirlər ki, biz də quldur, rüşvətxoruq. Bu məqsədə çata bilməyəcəksiniz. Biz isə oğurlanmış hər şeyi qaytarmağa davam edəcəyik, başqa variant yoxdur”, - Paşinyan bildirib.