"Hazırda Azərbaycan xarici siyasətinin əsas prioritetlərindən biri tarixi vətənindən etnik təmizləmə siyasətinin qurbanına çevrilmiş 300 mindən çox azərbaycanlının öz tarixi torpaqlarına qayıtmasıdır. 2022-ci il dekabr ayının 24-də Azərbaycan Prezidenti Qərbi Azərbaycan ziyalılarının bir qrupu ilə görüşü zamanı Qərbi Azərbaycana sülhlə qayıtmağımızı xüsusi konsepsiya kimi müəyyənləşdirdi. Qərbi Azərbaycan Azərbaycan mədəniyyətinin, mənəviyyatının, formalaşdığı mühüm coğrafiyalardan biridir.
Bu sözləri Ednews-a açıqlamasında Qərbi Azərbaycan İcması İdarə Heyəti sədrinin müavini, Milli Məclisin deputatı Hikmət Babaoğlu mayın 1-də Qərbi Azərbaycan Televiziyasının binasının açılışı ilə bağlı fikir bildirərkən deyib.
Onun sözlərinə görə, Qərbi Azərbaycanda xalqımızın yaratdığı böyük tarixi miras var. Maddi, mədəni, irs var və eyni zamanda Qərbi Azərbaycana qayıtmaq bugün beynəlxalq hüquqla qərbi azərbaycanlılara tanınmış haqqdır.
"Hazırki münasibətlərdə xüsusi güc vasitələrindən biri informasiya gücüdür. Yumşaq güc kimi xarakterizə olunan bu güc heç şübhəsiz ki, həm qlobal ictimai rəyin obyektiv əsaslarda formalaşması üçün, həm də milli tarixi yaddaşımızın canlı tutulması üçün vacibdir. Buna görə də, Qərbi Azərbaycan televiziyasının qarşısında bugün iki mühüm istiqamət dayanır. Birincisi, tarixi yaddaşın bərpa olunması, milli mədəni irsimizin həm Azərbaycanda, həm də Azərbaycandan kənarda təbliğ olunması. İkincisi isə, milli gücümüzü səfərbər edərək dünyaya Qərbi Azərbaycan həqiqətlərini çatdırmaqla, onların Qərbi Azərbaycana dönüşü ilə bağlı qlobal ictimai rəy formalaşdırmaqdır. Buna görə də mən düşünürəm ki, Qərbi Azərbaycan televiziyası məhz bu istiqamətdə ixtisaslaşmış xüsusi internet vasitəsi kimi mühüm strateji vəzifələri yerinə yetirməlidir. Ona görə də bu televiziyanın yaranması olduqca əhəmiyyətlidir. Çünki hazırki yeni reallıqlar kontekstində vətənimizin bir parçası olan Qərbi Azərbaycana sülhlə qayıtmaq Azərbaycanın strateji hədəflərindən biridir".
Aysel