Bu gün Moskva şəhərinin Ryazansk prospektindəki yaşayış binasında yerli vaxtla saat 6 radələrində terror aksiyası baş tutub.

EDnews xəbər verir ki,elektroskuterə bərkidilmiş partlayıcı vasitənin partladılması nəticəsində Rusiya Silahlı Qüvvələrinin Radiasiya, Kimyəvi və Bioloji Müdafiə Qoşunlarının rəisi  general-leytenantı İqor Kirilov və köməkçisi həlak olub.

Xatırladaq ki, 54 yaşlı Kirillov 2017-ci ildən Rusiya Silahlı Qüvvələrinin Radiasiya, Kimyəvi və Bioloji Müdafiə Qoşunlarının rəisi vəzifəsini tutub.

Hərbi münaqişə zamanı o, dəfələrlə Ukrayna Silahlı Qüvvələrini kimyəvi silahdan istifadə etməkdə ittiham edib. Oktyabrda Kirillov bildirib ki, Ukrayna ordusu Kursk vilayətinin Sudja şəhərində Qərbdə istehsal olunan kimyəvi silahdan istifadə edib. Onun sözlərinə görə, Ukrayna Silahlı Qüvvələri tərkibində xlor, eləcə də boğucu təsirə malik zəhərli maddələr olan 155 mm çaplı DM-105 kasetli sursatlardan istifadə edib.

2022-ci ildə Kirillov Ukraynadakı "ABŞ-ın nəzarət etdiyi" biolaboratoriyalar haqqında məlumat verib, burada güya "Amerika sifarişçiləri" ağcaqanadları müxtəlif xəstəliklərin daşıyıcısı etmək niyyətində idilər. Daha sonra Kirillov xəbərdarlıq edib ki, virus daşıyan ağcaqanadlar Rusiya ordusuna qarşı istifadə üçün "yüksək texniki hazırlıq səviyyəsindədir".