“Türkiyə strateji tərəfdaşları ilə birlikdə Avropa, Asiya və Yaxın Şərq arasında ticarət əlaqələrinə və inkişafına töhfə verəcək nəqliyyat-logistika dəhlizlərini işə salmağı planlaşdırır. İraqın Bəsrə şəhəri üzərindən keçən dəhliz və Xəzər dənizi ilə Zəngəzur marşrutları da buna aiddir”.

EDnews xəbər verir ki, bu barədə Türkiyə Prezidenti Rəcəb Tayyib Ərdoğan Ankarada Türkiyənin 2030-cu ilədək Sənaye və Texnologiya Strategiyasının təqdimatında məlumat verib.

Onun sözlərinə görə, Türkiyə türk dövlətləri, Yaxın Şərq və Afrika ölkələri ilə toplanmış sənaye təcrübəsini bölüşməyə hazırdır. Bu da həmin ölkələrin iqtisadi və elmi-tədqiqat potensialının güclənməsinə töhfə verəcək.

Ərdoğan vurğulayıb ki, Ankara qlobal proqnozları nəzərə alaraq milli inkişaf modelləri formalaşdırır.

Dövlət başçısı Türkiyədə maksimal rəqabət qabiliyyətinə malik məhsul istehsalına imkan verən sənaye ekosisteminin formalaşacağına ümid etdiyini bildirib.

“Hədəfimiz Türkiyənin texnoloji müstəqilliyinə nail olmaqdır. Biz yeni texnologiyaların inkişafına, həmçinin yüksək texnologiyalı məhsulların istehsalı və ixracının genişləndirilməsinə çalışırıq”, – deyə Rəcəb Tayyib Ərdoğan vurğulayıb.

O qeyd edib ki, son 23 il ərzində Türkiyə beynəlxalq arenada güc balansına təsir göstərən faktora çevrilən ciddi nailiyyətlər əldə edib.

Türkiyə lideri KAAN beşinci nəsil yerli hərbi təyyarə layihəsini, TOGG elektrik avtomobilini, eləcə də komponentlərinin 80 faizdən çoxunun Türkiyədə hazırlandığı TÜRKSAT 6A telekommunikasiya peykini innovativ nailiyyətlər arasında göstərib.

“Bu gün Türkiyə peyk hazırlamaq qabiliyyətinə malik 11 ölkədən biridir”, – deyə o bildirib və Türkiyə istehsalı olan pilotsuz uçuş aparatlarını qürur mənbəyi adlandırıb.

Fatimə Şükürova // EDnews