Somalinin paytaxtı Moqadişuda hökumət əleyhinə planlaşdırılan etirazlar ərəfəsində hökumət qüvvələri ilə müxalifətlə müttəfiq olan silahlı qruplar arasında atışma baş verib.
EDnews "Reuters"a istinadən xəbər verir ki, Somalinin paytaxtı Moqadişuda hökumət qoşunları və müxalifətlə müttəfiq olan milislər arasında silahlı qarşıdurma yaşanıb.
Sakinlərin agentliyə bildirdiyinə görə, atışma gecə saatlarında başlayıb və cümə axşamı səhərinə qədər davam edib.
Hadisə nəticəsində əmlaka ziyan dəyib, bəzi mülki şəxslər isə yaşadıqları əraziləri tərk etməyə məcbur olublar.
Qarşıdurmalar Prezident Həsən Şeyx Məhəmmədin səlahiyyət müddəti bitdikdən sonra vəzifəsində qalmasına etiraz olaraq planlaşdırılan aksiyalar ərəfəsində baş verib.
Qeyd olunur ki, mart ayında Somali parlamenti konstitusiya dəyişikliklərini dəstəkləyib. Bu dəyişikliklər Prezident Məhəmmədə səlahiyyət müddətini bir il uzatmağa və seçkiləri təxirə salmağa imkan verib.
Sakinlərin məlumatına görə, döyüşlər çərşənbə günü saat 17:00 radələrində başlayıb.
Minlərlə hökumət hərbçisi Moqadişunun Howlwadag və Abdiasis rayonlarına yerləşdirilib. Daha sonra hökumət qüvvələri ilə müxalifəti dəstəkləyən milislər arasında atışma baş verib.
“Qonşumun evinə minaatan mərmisi düşüb və nəticədə bir ana yaralanıb. Yaxınlığımızdakı böyük bir ev də alovlanıb, üzərinə minaatanlar və digər silahlar düşüb”, – deyə sakinlərdən biri Əhməd İsmayıl Reuters-ə bildirib.
Reuters yazır ki, Somalinin informasiya və müdafiə nazirləri agentliyin zənglərinə və mesajlarına cavab verməyiblər.
Məhəmmədəli Cəlalzadə | EDnews
.jpg)
.jpg)
