Avropa ölkələri Ukrayna ilə birlikdə Rusiyanı sülh danışıqlarına cəlb etmək məqsədilə yeni strategiya üzərində işləyirlər.
EDnews-un məlumatına görə, təşəbbüsün əsas məqsədi döyüş meydanındakı vəziyyəti Ukraynanın xeyrinə dəyişmək və müharibənin diplomatik həlli üçün şərait yaratmaqdır.
Avropanın üç aparıcı iqtisadi gücü olan Almaniya, Fransa və Böyük Britaniyanın rəsmiləri münaqişə tərəflərinin iştirakı ilə mümkün danışıqlar mexanizmlərini müzakirə edirlər. Bu istiqamətdə Ukrayna tərəfi ilə artıq bir sıra məsləhətləşmələr aparılıb.
Mənbələr bildirirlər ki, Avropa liderləri Rusiya Prezidenti Vladimir Putini danışıqlar masasına gətirmək üçün əlverişli imkan yarandığını düşünürlər. Buna səbəb kimi ABŞ-nin vasitəçilik etdiyi danışıqların nəticəsiz qalması və Rusiya ordusunun cəbhədə artan itkilərlə üzləşməsi göstərilir.
Avropalı müttəfiqlər qış mövsümünə qədər diplomatik irəliləyiş əldə etməyə çalışırlar. Onların qənaətincə, Kreml qarşıdakı aylarda Ukraynanın enerji infrastrukturuna və mülki obyektlərinə hücumları intensivləşdirə bilər ki, bu da yeni humanitar problemlər yarada bilər.
Bununla yanaşı, mənbələr vurğulayırlar ki, Avropa ölkələri Kiyevə hər hansı güzəşt diktə etməyi planlaşdırmırlar. Rusiya ilə danışıqların başlanması və mümkün razılaşmalarla bağlı yekun qərarın yalnız Ukrayna Prezidenti Vladimir Zelenski tərəfindən veriləcəyi qeyd olunur.
Məlumata görə, Böyük Britaniyanın Baş naziri Keir Starmer yaxın günlərdə Fransa Prezidenti Emmanuel Makron və Almaniya Kansleri Fridrix Merz ilə görüşərək növbəti addımları koordinasiya edəcək.
Ukrayna tərəfi də diplomatik həll variantlarına açıq olduğunu bəyan edib. Prezident Vladimir Zelenski daha əvvəl müharibənin başa çatdırılması üçün müxtəlif formatlarda danışıqlara, o cümlədən Rusiya rəhbərliyi ilə birbaşa təmaslara hazır olduqlarını bildirib.
Qeyd edək ki, son aylarda cəbhədə Rusiyanın hücum tempi zəifləyib. Ukrayna ordusu isə uzaqmənzilli pilotsuz uçuş aparatlarından istifadə etməklə Rusiyanın hərbi və müdafiə sənayesi obyektlərinə zərbələr endirməyə davam edir.
Aytac Kərimova | EDnews
.png)
