Ermənistanın gələcək xarici siyasi kursu — Avropa İttifaqına doğru hərəkət etməsi, yoxsa Avrasiya inteqrasiyasında tamhüquqlu iştirakını davam etdirməsi məsələsi getdikcə daha aktual xarakter alır.
Bu barədə EDnews-a açıqlamasında rusiyalı politoloq Dmitri Solonnikov bildirib.
Onun sözlərinə görə, bu mövzu nə bu gün yaranıb, nə də yalnız qarşıdan gələn seçkilərlə bağlıdır.
Ekspert qeyd edib ki, suallar tədricən yığılıb — Ermənistan Avropa İttifaqı ilə yaxınlaşma istiqamətində addımlar atdıqca bu məsələ daha da aktuallaşıb.
Solonnikov bildirib ki, İrəvan Avropa İttifaqı ilə əməkdaşlığı nə qədər fəal inkişaf etdirir və Avropa qaydalarına uyğunlaşmağa çalışırsa, Rusiya və Avrasiya İqtisadi İttifaqı ilə əvvəlki münasibət formatının qorunub-saxlanılması ilə bağlı suallar da bir o qədər artır.
“Son vaxtlar bu məsələ qarşıdan gələn seçkilərlə əlaqədar əlavə siyasi kontekst qazanıb. Amma seçkilər sadəcə bir növ tətikləyici amildir. Suallar seçkilərə görə deyil, Paşinyanın uzun müddətdir həyata keçirdiyi siyasət nəticəsində yaranıb”, — deyə politoloq bildirib.
Ekspertin fikrincə, Ermənistanın Baş naziri Nikol Paşinyan ölkənin gələcəyini harada gördüyünü dəqiq müəyyənləşdirməlidir: Avropaya inteqrasiyada, yoxsa Avrasiya məkanında.
“Rusiyada dəfələrlə deyildiyi kimi, eyni anda iki masada oturmaq mümkün deyil. Seçim etmək lazımdır”, — deyə Solonnikov vurğulayıb.
Solonnikov hesab edir ki, Ermənistanda qarşıdan gələn seçkilərin nəticəsi ölkənin həm Rusiya, həm də Avrasiya İqtisadi İttifaqı ilə gələcək münasibətlər formatını müəyyən edə bilər.
“İndi hamı Ermənistanın hazırkı rəhbərliyinin reaksiyasını gözləyir. Paşinyan hakimiyyəti qoruyub saxlayacaqmı, koalisiya formalaşdırmağa məcbur olacaqmı, yoxsa hakimiyyətə başqa siyasi qüvvələr gələcək — bu, seçkilərdən sonra məlum olacaq”, — deyə politoloq yekunlaşdırıb.
Xatırladaq ki, Ermənistan rəsmən 2025-ci ildə Avropa İttifaqı ilə yaxınlaşma prosesinə başlayıb. Məhz bundan sonra Rusiya rəsmiləri İrəvanı bu addımın mümkün siyasi və iqtisadi nəticələri barədə xəbərdar etməyə başlayıblar.
Aysel Hacıyeva | EDnews
.png)
.png)
