ABŞ Venesuelada keçirilən əməliyyata oxşar bir əməliyyatla Kuba Prezidenti Migel Dias-Kanelin oğurlandığı və ya öldürüldüyü ehtimalını nəzərdən keçirir. Bu barədə Pentaqon rəhbəri Pit Heqset jurnalistlərə bildirib.
Məlumatlar təsdiqlənməsə də, hadisə Kubada mümkün hakimiyyət dəyişikliyi ssenariləri barədə suallar doğurub.
Bəs belə bir vəziyyət baş verərsə, ölkəni hansı siyasi, iqtisadi və geosiyasi proseslər gözləyə bilər? Kubanın gələcəyi və regiona təsirləri nə ola bilər?
Bununla bağlı EDnews – a açıqlama verən politoloq Natiq Miri deyib ki, ABŞ Prezidenti Donald Trampın siyasəti fonunda Kuba prezidenti hələlik müqavimət göstərə bilir və heç bir güzəştə getmir.
“Baxmayaraq ki, iqtisadi blokada şəraitində Kubanın vəziyyəti olduqca ağırdır. Bu isə ölkə daxilində müəyyən sosial etirazlara səbəb ola bilər.
Bundan başqa, ABŞ-nin Venesuela prezidenti ilə bağlı həyata keçirdiyi iddia olunan əməliyyata bənzər addımlar ata biləcəyi ehtimalı da səsləndirilir. Həmçinin sabiq prezident Raul Kastronun həbs edilərək ABŞ-yə aparılması ilə bağlı müxtəlif fikirlər irəli sürülür.
Əgər Kuba prezidenti ABŞ-nin şərtlərini qəbul etməsə, Donald Tramp daha irəli gedərək, mövcud imkanlar çərçivəsində ilk fürsətdə Venesueladakı ssenariyə bənzər əməliyyatı Kubada da həyata keçirə bilər. Doğrudur, Kuba daha döyüşkən xalq kimi tanınır. Hətta iddialara görə, Venesuelada Maduronu qoruyan bəzi hərbçilər kubalı olub. Həmin qüvvələrin ABŞ-nin xüsusi əməliyyatları zamanı müqavimət göstərdiyi, yaralanan və həlak olanların olduğu bildirilir. Bu səbəbdən Kubada belə bir əməliyyatın həyata keçirilməsi daha təhlükəli hesab olunur”.
O deyir ki, digər tərəfdən, birbaşa hərbi müdaxilə ehtimalı da müzakirə olunur. Lakin bu ssenari ABŞ üçün ciddi risklər yarada bilər.
“Hazırda bunlar daha çox planlaşdırma və ehtimal səviyyəsində qiymətləndirilir. Bununla belə, Trampın Kubanın ABŞ-nin təsir dairəsinə keçməsini hədəflədiyi barədə fikirlər mövcuddur. Burada əsas məsələ bunun nə vaxt və hansı imkanlar çərçivəsində həyata keçiriləcəyidir.
İddialara görə, məqsəd Venesuelada olduğu kimi Kubada da hakimiyyət dəyişikliyinə nail olmaq, amerikayönümlü bir hökumət formalaşdırmaq və bununla Amerika qitəsində Vaşinqtona qarşı mövqe tutan dövlətlərin imkanlarını məhdudlaşdırmaqdır.
Məlumdur ki, Kubada keçmiş SSRİ-nin varisi olan Rusiyanın, eləcə də Çinin müəyyən təsir imkanları mövcuddur. Bu baxımdan, həmin qlobal güclərin Amerika qitəsində təsirini azaltmaq və onların ABŞ-yə meydan oxuma potensialını zəiflətmək üçün Kubada hakimiyyət dəyişikliyinə ehtiyac olduğu barədə fikirlər səsləndirilir.
Bütün planlaşdırmanın da bu məqsədə xidmət etdiyi iddia olunur. Lakin bu ssenarilərin nə dərəcədə real olduğunu yalnız zaman göstərəcək” - deyə politoloq əlavə edib.
Şəbnəm İbrahimxəlilova | EDnews
