İsveçrə Xarici İşlər Nazirliyi cümə günü səhər saatlarında ABŞ və İran arasında həmin günə planlaşdırılan danışıqların baş tutmayacağını açıqlayıb.
EDnews xəbər verir ki, nazirliyin yaydığı bəyanatda Bürgenstockda keçirilməsi nəzərdə tutulan müzakirələrin planlaşdırıldığı kimi baş tutmayacağı bildirilib.
“Bürgenstockda müzakirə bu gün planlaşdırıldığı kimi keçirilməyəcək. Nəticə etibarilə, dünən elan edilən görüş ləğv olunur”, - deyə bəyanatda qeyd olunub.
Nazirlik ayrıca açıqlamasında planlaşdırılan danışıqların təxirə salındığını bildirib.
“ABŞ, İran, Qətər və Pakistan arasında planlaşdırılan danışıqlar təxirə salınıb. İsveçrə bu danışıqlara vasitəçilik etməyə hazır olaraq qalır”, - deyə məlumatda vurğulanıb.
Açıqlama Ağ Evin ABŞ vitse-prezidenti JD Vance-in İsveçrəyə səfər etməyəcəyini bildirməsindən dərhal sonra yayılıb. Ağ Ev görüşlə bağlı texniki danışıqların logistikasına dair detalların hələ də razılaşdırılmadığını qeyd edib.
Məlumata görə, çərşənbə axşamı ABŞ Prezidenti Donald Tramp və İran Prezidenti Məsud Pezeşkian “İslamabad Anlaşma Memorandumu”nu elektron qaydada imzalayıblar. Sənədin Vaşinqton və Təl-Əviv tərəfindən fevralın 28-də İrana qarşı başladıldığı bildirilən müharibənin başa çatdırılmasına zəmin yaratmaq məqsədi daşıdığı qeyd olunur.
Pakistanın Baş naziri Şahbaz Şərifin sözlərinə görə, razılaşmanın şərtlərinə əsasən, İran strateji əhəmiyyətli Hörmüz boğazını dərhal yenidən açmalı, ABŞ isə dəniz blokadasını aradan qaldırmalıdır. Şahbaz Şərif sənədi vasitəçi qismində imzalayıb.
