Birləşmiş Ərəb Əmirliklərinin (BƏƏ) Milli Fövqəladə Hallar, Böhran və Fəlakətlər İdarəsi iyulun 12-si səhər saatlarında qeydə alınan raket təhdidlərinin ölkəyə təsir etmədiyini açıqlayıb.
EDnews xəbər verir ki, qurumun yaydığı bəyanatda raketlərin BƏƏ sərhədlərindən kənarda qeydə alındığı və ölkədə təhlükəsizlik vəziyyətinin sabit olaraq qaldığı bildirilib.
"Bu səhər qeydə alınan raket təhdidləri ölkə sərhədlərindən kənarda yaranıb. Hazırda narahatlığa heç bir səbəb yoxdur. Vəziyyət sabitdir və tam nəzarət altındadır", – deyə açıqlamada vurğulanıb.
Bildirilib ki, milli monitorinq sistemləri sutka ərzində fasiləsiz fəaliyyət göstərir və bütün aidiyyəti qurumlar yüksək hazırlıq vəziyyətindədir. Qeyd olunub ki, real təhlükə ehtimalı minimal olsa belə, profilaktik tədbir kimi əhaliyə xəbərdarlıq siqnalları verilir.
Xatırladaq ki, iyulun 12-də BƏƏ Müdafiə Nazirliyi İran tərəfindən buraxıldığı bildirilən raket və pilotsuz uçuş aparatlarının zərərsizləşdirildiyini açıqlamışdı. Oxşar hücumlar həmin gün Bəhreyn, Qətər, Küveyt və Oman istiqamətlərində də qeydə alınıb.
