Fırıldaqçıların başqa şəxslərin fərdi məlumatlarından istifadə edərək onların adına kredit və ya mikrokredit rəsmiləşdirməsi halları getdikcə daha ciddi problemə çevrilir.
Zərərçəkənlər bir çox hallarda borcdan yalnız bankın və ya kollektor şirkətinin zəngindən sonra xəbər tuturlar.
EDnews xəbər verir ki, RİAMO nəşri belə vəziyyətlə üzləşən şəxslərin atmalı olduğu altı əsas addımı təqdim edib.
Mütəxəssislərin sözlərinə görə, cinayətkarlar itirilmiş şəxsiyyət sənədlərindən, sızdırılmış fərdi məlumatlardan və vətəndaşın elektron hesablarına qanunsuz giriş imkanından istifadə edə bilərlər. Xüsusilə bəzi mikromaliyyə təşkilatlarında kreditin məsafədən və sadələşdirilmiş qaydada rəsmiləşdirilməsi riski artırır.
İlk növbədə, vətəndaş kredit tarixçəsini yoxlamalı, adına hansı təşkilatda və nə qədər borc rəsmiləşdirildiyini dəqiqləşdirməlidir. Şübhəli kredit aşkarlandıqda dərhal onu verən banka və ya mikromaliyyə təşkilatına müraciət edilməlidir.
İkinci addım olaraq maliyyə təşkilatına yazılı ərizə təqdim olunmalı, daxili araşdırmanın aparılması və qanunsuz rəsmiləşdirilmiş borcun ləğv edilməsi tələb olunmalıdır. Ərizəyə kreditin götürüldüyü vaxt şəxsin başqa yerdə olduğunu, sənədini itirdiyini və ya əməliyyatda iştirak etmədiyini təsdiqləyən sübutların əlavə olunması tövsiyə edilir.
Bununla yanaşı, kredit müqaviləsinin, müraciət zamanı təqdim edilmiş sənədlərin və kredit təşkilatının filialında olan müşahidə kameralarının görüntülərinin surətləri istənilməlidir. Bu materiallar sonradan məhkəmə araşdırmasında mühüm sübut rolunu oynaya bilər.
Üçüncü mərhələdə isə hüquq-mühafizə orqanlarına fırıldaqçılıq faktı ilə bağlı müraciət edilməlidir. Ərizədə hadisənin bütün təfərrüatları göstərilməli, kredit tarixçəsindən çıxarış, bankın arayışı və digər sübutlar təqdim olunmalıdır.
Kredit mikromaliyyə təşkilatı vasitəsilə rəsmiləşdirilibsə, həmin qurumun fəaliyyətinə nəzarət edən müvafiq maliyyə və özünütənzimləmə təşkilatlarına da şikayət göndərilməsi məsləhət görülür. Bu zaman borcalanın şəxsiyyətinin düzgün müəyyənləşdirilib-müəyyənləşdirilmədiyi araşdırıla bilər.
Bank və ya mikromaliyyə təşkilatı borcu ləğv etməkdən imtina etdiyi halda maliyyə bazarına nəzarət edən dövlət qurumuna rəsmi şikayət təqdim olunmalıdır.
Sonuncu addım isə məhkəməyə müraciətdir. Vətəndaş kredit müqaviləsinin onun tərəfindən bağlanmadığının tanınmasını və borcun ləğvini tələb edə bilər. İddia ərizəsinə kredit müqaviləsi, banka və polisə edilən müraciətlər, həmin müraciətlərə verilən cavablar və şəxsin kredit götürmədiyini göstərən digər sübutlar əlavə olunmalıdır.
Mütəxəssislər xəbərdarlıq edirlər ki, bank əməkdaşları telefonla kartın CVV kodunu, mobil tətbiqin şifrəsini və birdəfəlik təsdiq kodlarını istəmirlər. Özünü bankın təhlükəsizlik xidmətinin əməkdaşı kimi təqdim edən şəxslərə fərdi və maliyyə məlumatlarının verilməsi ciddi risk yaradır.
Aytac Kərimova | EDnews
