Rusiya avqustun 6-dan bəri ciddi cəhdlərə baxmayaraq, Ukrayna ordusunu Kurskun sərhəd bölgələrində tutduğu ərazilərdən çıxara bilmir. Hətta ötən gün Aleksey Smirnov Putinlə görüşündə deyib ki, Kursk vilayətində vəziyyət mürəkkəbdir, 74 yaşayış məntəqəsi artıq Ukraynanın nəzarəti altına keçib. Görünür Kiyev ordusu öz mövqeyini möhkəmlətmək niyyətindədir.
Bəs 81 ildən sonra baş tutan 2-ci Kursk döyüşü, 1-ci kimi həlledici olacaqmı?
Ednews - a danışan, İrlandiyalı tarixçi və politoloq Petrik Uolş, bunun ilk Kursk döyüşü qədər əhəmiyyətli olmasına şübhə ilə yanaşır:
“İkinci Kursk döyüşünün birinci döyüşün miqyası və əhəmiyyəti səviyyəsində olacağına şübhə edirəm. Putin Ukrayna qüvvələrinə əslində komando qrupu kimi yanaşır və bunu işğal deyil, antiterror əməliyyatı kimi xarakterizə edir. Rusiya Ukrayna hücumunun boş və mənasız bir şou olduğunu, müharibənin isə Donbasda daha həlledici olduğunu çox yaxşı bilir. Kreml Ukraynanın buradakı niyyətinin rus qüvvələrinin Kurska yönləndirmək cəhdi olduğunu bilir, lakin ruslar bu oyuna əməl etmir. Kiyev yalnız kiçik yaşayış məntəqələri, strateji əhəmiyyəti az olan və Rusiya qüvvələrinin az olduğu əraziyə soxulmağa başlayıb. Burada motiv az resursla maksimum siyasi təsir göstərməkdir. Aydındır ki, Rusiyanın Qərb mediasında bu qüvvələri sıxışdıra bilməməsi ajiotaja səbəb olur və olacaq, lakin onların davamlı mövcudluğu Rusiyanın müdaxiləyə hansı səviyyədə güc tətbiq etməsindən asılıdır. Hazırda Kreml situasiyaya ciddi təhdid deyil, xırda bir biabırçılıq kimi, gözlənilməz narahatlıq kimi yanaşır. Kreml əsas işinə sadiq qalır və bu cür şoulardan yayınır. Təbii ki, Kiyevin niyyəti isə bunun əksidir”.
Alman siyasi analitik Brendan Freyser saytımıza şərhində bildirdi ki, Kursk vilayətinin tutulması böyük əhəmiyyət daşıya bilər:
“Ukraynanın Kurska hücum etməsi mövcud döyüşlərin dinamikasını dəyişdi. Geridə qoyduğumuz 2.5 il müddətində davam edən münaqişə çərçivəsində belə bir hadisə baş verməmişdi. Burada nəzərə almalıyıq ki, hadisə tam da gözlənilməz bir zamanda baş verdi. Hansı ki, Rusiya bir növ artıq rahatlamış, münaqişəni bitirmək istədiyi bir vaxta təsadüf edir. Bu da münaqişənin əhəmiyyətli dərəcədə genişlənməsinə işarə edir. Daha 2 gün əvvəl Ukraynanın ələ keçirdiyi yaşayış məntəqələrin sayı 28 idisə, hazırda Zelenski bunun 74-ə yüksəldiyini bildirir. Əlbəttə burada biraz da praqmatik yanaşmalıyıq. Rusiya müdaxiləni qınadığı kimi, bunun elə əhəmiyyətli olmadığını, israfçılıq olduğunu atdığı addımlarla göstərir. Hansı ki, bu perspektivə də müəyyən haqq qazandırmaq lazımdır. Kiyev bir növ Kremli yoxlayır - Rusiyanın möhkəmləndiyi şərqi Ukrayna ərazilərindəki qüvvələrini buraya cəlb etməyə çalışır. Bu isə elə asanlıqla baş verəcək bir hadisə deyil. Nəzərə alsaq ki, Rusiya həmişə olduğu kimi bir əsl müharibə maşınıdır, canlı qüvvəsi olduqca yüksəkdir. Bu da əsasən Ukraynanın strateji addımlarından aslıdır. Ukrayna Rusiyanı Donbas kimi digər cəbhələrdən resursları yayındırmağa məcbur edərək ələ keçirdiyi ərazini saxlamağa cəhd edə bilər. Bu əməliyyat ilk olaraq Rusiya vətəndaşlarını hökumətin ətrafında birləşdirə bilsə də, Rusiya torpaqlarında davamlı hərbi əməliyyatlar, nəticədə artan ictimai narazılığa səbəb ola bilər. Bu, müharibəyə daxili dəstəyi zəiflədə və potensial olaraq Putin rejiminin sabitliyini poza bilər. Düşünürəm situasiya ilə bağlı yetərincə danışmaq olar, lakin çox qısa şəkildə bunun mümkün nəticəsini deyərək yekunlaşdırmaq istəyirəm. Əməliyyatın uğuru və ya uğursuzluğu regional və qlobal təhlükəsizliyə geniş təsir göstərə bilər. Ukrayna əməliyyatı uğurlu olarsa, digər dövlətləri Rusiyanın maraqlarına qarşı daha aqressiv hərəkətləri dəstəkləməyə sövq edə bilər, qısaca geniş bir müharibə. Uğursuz olarsa münaqişəyə daha ehtiyatlı yanaşmaya səbəb ola bilər, sülh çağırışlarına səbəb olacaq".
Əkbər Novruz
