İspan jurnalist Alexandro Marko del Pontun Ukrayna ilə bağlı yayımladığı məqalə siyasi dairələrdə ciddi müzakirələrə səbəb olub. O, ölkənin Polşa, Almaniya, Rumıniya və Böyük Britaniya arasında zonalara ayrılacağını iddia edib.

Jurnalist adıçəkilən 4 dövlətin Ukraynanın gələcək taleyi ilə bağlı qərar verəcəyini bildirib. Qərb ölkələrinin Kiyevlə bağlı fərdi maraqlarının olduğunu qeyd edib.

Bu iddia nə dərəcədə reallığa uyğundur? Belə bir situasiyada Rusiyanın mövqeyi necə olacaq?

EDnews xəbər verir ki, Globalinfo.az-a danışan politoloq Ramiyə Məmmədova deyib ki, Ukrayna müharibəsi başladıqdan sonra ABŞ və Avropa mətbuat orqanları geniş şəkildə Rusiyanın Ukrayna torpaqlarını öncə işğal altına alıb, daha sonra ilhaq edəcəyinə dair xəbərlər tirajlamağa başladı:

“Yəni Rusiyanın SSRİ dövründə olduğu kimi Ukraynanı ilhaq edib daxili subyekti halına gətirmək istədiyini deyirlər. Qərb əslində Kiyevə resursları və təbii sərvətləri üçün diqqət yetirir, onların Moskvanın nəzarətinə keçməsini istəmir.

Rusiya Krımı faktiki olaraq ilhaq edib. Donbask və Luqansk da de-fakto Kremlin nəzarətindədir. Moskva Avropa İttifaqı (Aİ) ölkələrinin Qara dənizdə rahat olmasını istəmir. Çünki ən böyük donanması məhz buradadır. Ona görə Odessa şəhəri ruslar üçün bu qədər əhəmiyyətlidir”.

Politoloqun sözlərinə görə, Ukraynanın iddia olunduğu kimi 4 ölkə arasında bölüşüdürülməsi sadəcə xülyadır və reallığı əks etdirmir:

“Çünki dünyada bu kimi bir təcrübə yoxdur. Olsa belə, Polşa, Almaniya, Rumıniya və Böyük Britaniyanın Ukraynada nüfuzlarını uzun müddət qoruya bilmələri mümkün deyil. İkinci Dünya müharibəsi bitdən sonra 1945-ci ildə Almaniya bölünmüşdü, lakin bu, əbədi olmadı. İndi Ukraynanın eyni taleyi yaşaması üçün əsas yoxdur.

Fikrimcə, Ukrayna müharibəsi artıq bitmiş bir mövzudur. Çünki Qərb Kiyevi danışıqlar masasına əyləşdirmək əvəzinə gərginliyi artırır. Bu isə müsbət heç bir şey vəd etmir. Ukrayna özü başa düşməlidir ki, bu müharibənin nəticəsi yoxdur. Hətta qarşıdurma bu ölkənin müstəqlliyini itirməsinə səbəb ola bilər”.