Rusiya Silahlı Qüvvələri tərəfindən Ukraynanın Zaporojye vilayətinə kütləvi hava hücumları təşkil olunub.

EDnews xəbər verir ki, Zaporojye Vilayət Hərbi Administrasiyasının yaydığı məlumata əsasən, hücumlar zamanı xüsusilə Yuxarı Tersa kəndindəki yaşayış evləri hədəfə alınıb. Dağıntılar nəticəsində evlərin altında qalanlar olub. İlkin bilgilərə görə, 49 yaşlı bir kişi yaralanıb.

Administrasiyanın açıqlamasına görə, ümumilikdə vilayətin 20 yaşayış məntəqəsinə 397 zərbə endirilib. Hücumlar nəticəsində bir nəfər həyatını itirib.

Ukrayna Hava Hücumundan Müdafiə Qüvvələri tərəfindən Rusiya ordusunun buraxdığı 45 qanadlı raket və 266 pilotsuz uçuş aparatı məhv edilib. Müdafiə sistemlərinin aktiv iştirakı daha böyük itkilərin qarşısını almağa kömək edib.

Eyni zamanda, Rusiya Kursk vilayətində hərbi qüvvə toplamağa başlayıb. Ukrayna mənbələrinin, o cümlədən UNIAN agentliyinin yaydığı məlumata görə, bu hazırlıq Sumı istiqamətində yeni mümkün hücum planının göstəricisidir. Ekspertlər bu hücumun təkcə Sumı ilə məhdudlaşmayacağını, Ukraynanın digər bölgələrinə də yayılma ehtimalının olduğunu bildirirlər.

Hazırda bölgədə humanitar vəziyyət gərgin olaraq qalır və mülki əhalinin təhlükəsizliyinin təmin olunması istiqamətində tədbirlər görülür.

 Fatıma Şükürova // EDnews