Aprelin 10-da Bakı Slavyan Universitetində (BSU)"İnklüziv təhsildən inklüziv cəmiyyətə: bərabər imkanlar və dayanıqlı inkişaf" (İTİC 2025) lll beynəlxalq elmi konfrans öz işinə başlayıb.
Konfransın açılış mərasimində BSU-nun rektoru Anar Nağıyev, Özbəkistan Respublikasının Nizami adına Daşkənd Dövlət Pedaqoji Universitetinin rektoru Abdugappor Qırğızbayev, Naxçıvan Dövlət Universitetinin rektoru Elbrus İsayev, Milli Məclisin deputatları Mehriban Vəliyeva və Nigar Məmmədova, Məktəbəqədər və Ümumi Təhsil üzrə Dövlət Agentliyinin direktor müavini Bakı Şəhəri üzrə Təhsil idarəsinin müdiri vəzifəsini icra edən Nərminə Hüseynova, "BP"-nin Xəzər regionu üzrə vitse-prezidenti Bəxtiyar Aslanbəyli, DOST İnklüziv inkişaf və Yaradıcılıq Mərkəzinin direktoru Elnarə Ənsari "Birgə və Sağlam" İctimai Birliyinin Autizm Mərkəzinin direktoru Aytən Eynalova, eləcə də Polşa, İtaliya və Finlandiyadan dəvət olunmuş tanınmış alim və mütəxəssislər, BSU-nun professor-müəllim heyəti və digər qonaqlar iştirak ediblər.
Tədbir Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü uğrunda canından keçmiş şəhidlərin xatirəsinin bir dəqiqəlik sükutla anılması ilə başlayıb.
Açılış mərasimində çıxış edən BSU-nun rektoru Anar Nağıyev inklüziv cəmiyyətin qurulması, təhsildə bərabər imkanların yaradılması istiqamətində dövlət səviyyəsində görülən tədbirlərdən danışıb. O bildirib ki,Prezident İlham Əliyevin rəhbərliyi ilə həyata keçirilən ardıcıl dövlət proqramları və "Azərbaycan 2030: sosial-iqtisadi inkişafa dair Milli Prioritetlər" sənədində qeyd olunan hədəflər bu istiqamətdə yol xəritəsi kimi çıxış edir. Rektor qeyd edib ki, BSU-da müəllim hazırlığında inklüziv yanaşmanın gücləndirilməsi, müasir tədris resurslarının yaradılması və bu sahədə peşəkar kadrların formalaşdırılması istiqamətində davamlı işlər aparılır.
Fatimə Mərdanlı // EDnews
