Banklardan kredit ala bilməyən bir çox insan ümidini lombardlara bağlayır. Ziynət əşyalarını girov qoyaraq pul əldə etmək son çarə olur.

Bəs girov qoyulan əşya zərər görərsə, və ya itərsə buna görə kim məsuliyyət daşıyır?

 
“EDnews” xəbər verir ki, məsələ ilə bağlı vəkil Rəşad Əliyev   girov qoyulan əşyanın itdiyi və ya zərər gördüyü  halda məsuliyyətin lombardın üzərinə düşdüyünü bildirib.

“Vətəndaş bununla bağlı mülki qaydada məhkəməyə müraciət edə bilər, əgər oğurlanma halı varsa isə hüquq-mühafizə orqanlarına müraciət edə bilər. Əgər ehtiyatsızlıqdan əşya itibsə, bu halda qarşılıqlı dəyəri lombard qarşılanmalıdır.

Mülki məcəllənin 302-ci maddəsinə əsasən, lombard krediti yalnız banklar və bank olmayan kredit təşkilatları tərəfindən həyata keçirilə bilər. Bu proses əsasında tərəflər arasında mütləq müqavilə imzalanır. Lombardın girov qoyulmuş əşyanı istifadə etmək və ya ona dair sərəncam vermək ixtiyarı yoxdur. Əşyanın lombardda girovu ilə təmin edilmiş kredit məbləği qaytarılmadıqda lombard onu sata bilər”.
Qeyd edək ki, lombard fəaliyyəti qanunvericiliklə tənzimlənir. Bu səbəbdən vətəndaş lombard xidmətlərindən istifadə edərkən ilk növbədə həmin təşkilatın lisenziyasının olub-olmamasını yoxlamalıdır.