Mədə yanması və qıcqırmanı adi narahatlıq hesab etmək ciddi fəsadlara səbəb ola bilər.
Mütəxəssislər bildirirlər ki, uzun illər davam edən reflüks xəstəliyi bəzi hallarda qida borusu xərçəngi riskini artıra bilər.
EDnews xəbər verir ki, ümumi cərrahiyyə və orqan transplantasiyası üzrə mütəxəssis Prof. Dr. Yaşar Özdenkayanın sözlərinə görə, hər reflüks xəstəsində xərçəng inkişaf etmir.
Lakin xəstəlik 15 il və ya daha uzun müddət davam etdikdə qida borusunda "Barrett özofaqusu" adlanan hüceyrə dəyişiklikləri yarana və bu da xərçəng riskini artıra bilər.
Mütəxəssis qeyd edib ki, gec saatlarda qidalanmaq, yeməkdən dərhal sonra uzanmaq və nizamsız həyat tərzi reflüksün daha da ağırlaşmasına səbəb olur.
Onun sözlərinə görə, son yeməklə yuxu arasında ən azı 4 saat fasilə saxlanılması, qazlı içkilərdən və siqaretdən uzaq durulması, həmçinin baş hissəsi bir qədər hündür vəziyyətdə yatmaq reflüksün qarşısının alınmasına kömək edir.
Həkim əlavə edib ki, gecə saatlarında baş verən reflüks tutmaları mədə turşusunun tənəffüs yollarına keçməsi nəticəsində ağciyər infeksiyalarına, hətta sətəlcəmə səbəb ola bilər.
Buna görə də uzun müddət davam edən mədə yanması və qıcqırma şikayətləri olan şəxslərin mütləq həkim müayinəsindən keçməsi tövsiyə olunur.
Aytac Kərimova | EDnews
