“Rusiya Ukraynaya  hücumla məhdudlaşmayacaq, sırada Polşa və Baltikyanı ölkələr gəlir”,- deyə fikir bildirən, ABŞ da prezdentliyə namizəd olan  Nikki Heylin açıqlaması böyük müzakirələrə səbəb olub.
Mövzu ilə bağlı Ednews-a danışan rusiyalı politoloq Sergey  Stankeviç qeyd edib ki, ABŞ-da noyabrda keçiriləcək prezidentlik uğrunda son mübarizədə Respublikaçılar və Demokratlar partiyalarından olan namizədləri seçmək üçün ştatlar üzrə partiyaların praymerizləri başlayıb. 
“Nikki Heyl hələ prezidentliyə namizəd olmaqdan uzaqdır. O, yalnız Respublikaçıların səsləri uğrunda mübarizədə namizəd olmağa çalışır. Onun vəziyyəti paradoksaldır. Respublikaçıların sorğuları onun Donald Trampı partiya liderliyində təxminən 20 faiz geridə qoyduğunu göstərir. Lakin prezident Baydenlə hipotetik təkbətək döyüşdə yalnız Nikki Heyli hazırkı prezidenti 7% xal fərqi ilə məğlub edir.
Heyli onun üçün həlledici aylara hazırlaşır, xüsusən də Rusiyaya qarşı getdikcə daha sərt bəyanatlar verir. Hesab edilir ki, bu, onun digər respublikaçı namizədlər arasında seçilməsinə kömək edəcək. Noyabr ayına qalan vaxtda deyilənlərin doğruluğu və reallığı heç kimi maraqlandırmır. Əsas odur ki, diqqəti cəlb etsin və seçicinin yaddaşında qalsın. Rusiyanın qonşu NATO ölkələrinə “hücum”u ilə bağlı bəyanat  fantaziyadır. Avropa ölkələrinin heç bir rəhbərliyi buna inanmır və bununla bağlı heç bir “çaxnaşma” müşahidə olunmur. Müvafiq olaraq, NATO blokunun Avropadakı gündəlik fəaliyyətində heç bir dəyişiklik yoxdur: onlar hərbi təhlükə görmürlər və xaricdən gələn spekulyativ seçki bəyanatlarını hiss etmirlər. Noyabrdan sonra bütün bu dalğa səngiyəcək”.

Afaq