Azərbaycan hökuməti Avropa Şurası və Avropa Məhkəməsindən çıxmaq məsələsinə baxır.

İlin sonunadək Azərbaycana qarşı ədalətli mövqe ortaya qoyulmasa, bu iki qurumdan çıxmaq barədə qərar qəbul oluna və addımlar atıla bilər.

Avropa Şurası və Avropa Məhkəməsindən  çıxmağın Azərbaycan üçün hansı mənfi və müsbət  təsirləri ola bilər?

Məsələ ilə bağlı politoloq Samir Hümbətov Ednews-a açıqlaması  zamanı bildirib ki, hər iki qurumdan ayrılmağın mənfi təsirlərini Avropa ölkələri düşünməlidir:

“Azərbaycan 2001-ci ilə qədər Avropa Şurasının üzvü deyildi. Həmçinin Avropa Məhkəməsi ilə əlaqələr yox idi və siyasətimizdə də hər şey normal irəlləyirdi.

Əgər bir qurumdakı Azərbaycana qarşı münasibətlərdə ikili standarta yol verilirsə, Azərbaycanın suveren ərazilərinin bərpasına qərəzli çıxış nümayiş olunursa, 23 ildə obyektiv bir qərar çıxarılıb tətbiq edilmirsə siyasi arenada Azərbaycan tərəfini günahlandırmaq qəbul edilməzdir.

BMT qətnamələrinə əsasən ölkə daxilində separatçı və terrorçu qruplara qarşı əməliyyat apararaq onları zərərləşdirmək, ərazi bütövlüyünü qorumaq hər bir ölkənin ən birinci hüququdur. Bu sferadan faza götürərək boş yerə qarayaxma edən şuranın idarəsində ciddi problem olduğu görünür. 

Politoloq hesab edir ki, Avropa Şurasında çıxmaq bizim siyasətimizə və iqtisadiyyatımıza mənfi təsir etməyəcək:

“Onsuzda biz AŞ-da olan 9 ölkə ilə strateji tərəfdaşlıqla bağlı müqavilə imzalamışıq.

Söhbət burda Avropa İttifaqına daxil olan 9 ölkədən gedir. Hazırda Azərbaycanla münasibətləri dərinləşdirməyə can atan bəzi Avropa dövlətləri var ki, biz onlarla enerji sahəsində əməkdaşlıqlarımız var. Çünki Avropanın yaxın gələcəkdə Azərbaycanın qazına və neftinə böyük ehtiyacı olacaq. Bu halda onlar bu cür siyasət aparmaqla oturduqları budağı kəsmiş olurlar”.

Politoloq son olaraq qeyd edib ki, Azərbaycanın nə Avropa Məhkəməsindən nə də Avropa Şurasından çıxmasını, Azərbaycanın ümumi inkişaf strategiyasına mənfi təsir etməyəcək. Sadəcə Avropa əvvəlki Azərbaycandan olan tərəfdaşlığı görməyə bilər. 

Xəyal Ramiz