Xəbər verdiyimiz kimi, Azərbaycanın internet-servis provayderi "Sazz” ilə bağlı redaksiyamıza bir çox abunəçi şikayət məktubları göndərilib. Abunəçilərin etirazı ondan ibarətdir ki, son günlər şəbəkədə internetin sürəti zəifdir və gün ərzində dalğa itir. Belə olan halda internetə qoşulmaq üçün problemlər yaşayırlar. Bunun səbəbi və həlli nə zaman olacaq? 

İnformasiya Kommunikasiya Texnologiyaları Agentliyindən Ednews-a verilən məlumata görə, ötən ilin sonlarından etibarən istifadəçilərin telekommunikasiya xidmətləri ilə bağlı İKTA-ya daxil olan müraciətlərin operativ və obyektiv şəkildə araşdırılması üçün “e-şikayət” sistemi istifadəyə verilib. Həmin sistem vasitəsilə ölkəmizdə fəaliyyət göstərən 150-dən artıq operator və provayderlə bağlı İKTA-ya daxil olan çoxlu sayda müraciət araşdırılıb və cavablandırılıb:

"Sözügedən sorğunun predmeti əsasında istehlakçılar tərəfindən gün ərzində İKTA-ya mövcud kommunikasiya vasitəsi üzərindən müvafiq şikayətlər və müraciətlər daxil olmayıb. Amma buna baxmayaraq, göndərilən media müraciəti əsasında provayderə müvafiq sorğu yönləndirilib. İstehlakçılara göstərilən internet telekommunikasiya xidmətinin keyfiyyət səviyyəsi barədə suala cavab olaraq isə qeyd edirik ki, 2023-cü ilin dekabrın 21-də Rəqəmsal İnkişaf və Nəqliyyat Nazirliyinin Kollegiyası tərəfindən “Rabitə və yüksək texnologiyalar sahəsi üzrə xidmətlərin, o cümlədən internet xidmətlərinin keyfiyyət göstəriciləri” təsdiq edilib. Həmin sənəddə telekommunikasiya operator və provayderlərinin istehlakçılara göstərdikləri xidmətlərin dayanıqlı və yüksəkkeyfiyyətli olmasına xüsusi diqqət yetirilir. Keyfiyyət göstəricilərinin aşağı olması isə Azərbaycan Respublikasının qanunvericiliyinə uyğun olaraq məsuliyyət yaradır".

Verilən məlumatda deyilir ki, təqdim edilən internetin sürətinin zəif, yaxud aşağıkeyfiyyətli olması hava şəraitinin və ya texniki nasazlığın təsirindən ola bilər: 

"Yaranmış mübahisələrin tez, ədalətli və şəffaf şəkildə həlli üçün İKTA tövsiyə edir ki, yaranan şikayətlər tənzimləyici quruma ətraflı araşdırılması üçün təqdim edilsin və əsl səbəbi müəyyənləşdirilsin.
Eyni zamanda bildiririk ki, operator və provayderlər tərəfindən təqdim olunan xidmətlərin keyfiyyətindən narazı olan istehlakçılar yuxarıda qeyd edilən “E-Şikayət” sistemi vasitəsilə tənzimləyici quruma müraciət edə və müraciətin icrasını real vaxt rejimində (“online”) izləyə bilərlər.

Bütün hallarda xidmət keyfiyyətinin gözlənilən səviyyədə olmamasını aşkar etmək üçün kifayət qədər sübutedici faktlar olmalıdır. Bu məqsədlə obyektivlik və operativliyin təmin edilməsi baxımından mühüm əhəmiyyət kəsb edən bu sistemdən istifadə etmək üçün vətəndaşlar https://e-complaint.icta.az linkinə daxil olmaqla “İdentifikasiya nömrəsi ilə” bölməsi vasitəsilə “Abunəçi” səhifəsinə keçid edib vətəndaş üçün avtomatik yaradılmış “Abunəçi kabineti”ndən şikayətlərini ünvanlaya bilərlər. Hər bir müraciət İKTA üçün müvafiq araşdırma aparmağa əsas verir.

“E-Şikayət” sistemindən istifadə ilə bağlı ətraflı məlumatı vizual təlimata nəzər yetirməklə əldə etmək olar".

Oğuz