Son iki ildə Daxili İşlər Nazirliyinin (DİN) Polis Akademiyasına qızların qəbulunun dayandırılması cəmiyyət arasında birmənalı qarşılanmayıb. Belə ki, mövzu sosial şəbəkələrdə və mediada böyük müzakirələrə səbəb olub. Hətta yayılan qeyri-rəsmi xəbərlərə görə, Mədəniyyət Nazirliyində də qadınların geyimi və dodaq boyasına görə xüsusi nizam komissiyası da fəaliyyətə başlayıb.
Demək olar ki, mövzu haqqında bir çox ictimai nümayəndələr də müxtəlif fikir bildirib. Kiminin fikrincə, polislərin iş rejimi ağır olduğundan, qadınlar bu işə cəlb olunmur.
Digərləri isə düşünür ki, bu birbaşa cinsi diskriminasiyadır. Qeyd edək ki, Azərbaycan Konstitusiyasına görə qadın və kişi hüquqları bərabərdir.
Daxili İşlər Nazirliyinin mətbuat xidmətinin şöbə rəisi, polis mayoru Elşad Hacıyev Ednews-a faktı təsdiqləyib.
"İki ildir ki, effektiv olmadığı üçün qadınların akademiyaya qəbulu dayandırılıb. Onun bərpası isə hələki gözlənilmir".
DİN rəsmisi həmçinin qeyd edib ki, Polis Akademiyası xüsusi təyinatlı təhsil müəsissəsi olduğu üçün onun fəaliyyəti Təhsil və Daxili İşlər Nazirliyinin təlimatları və göstərişləri əsasında fəaliyyət göstərir.
Məsələ ilə bağlı “Təmiz Dünya” Qadınlara Yardım İctimai Birliyinin sədri Mehriban Zeynalova isə Ednews-a açıqlamasında vəziyyətlə bağlı narahatlığını ifadə edib.
“Bu məlumatı oxuyanda çox məyus oldum. Yəqin ki, məsələ ilə bağlı çevik ekspert qrupu adından müraciət hazırlanacaq”.
M. Zeynalova qeyd edib ki, bu nə konstitusiyaya, nə də gender haqqında qəbul edilən qanuna uyğun deyil.
“Bir nəfər belə qəbul olsa, qadınların qəbulu məsələsi dayandırılmamalıdır”.
Hərbi ekspert Ədalət Verdiyev isə Ednews-a açıqlaması zamanı bildirib ki, Polis Akademiyasında əksəriyyəti oğlanlardan ibarət olan kollektivdə qızların sayı barmaqla sayılacaq qədər olsa belə ayrıca yataqxanaları vardı.
(5).jpg)
“Onlar üçün gündəlik növbətçiliyin təşkil edilməsi də, qadınların ailə qurması və digər səbəblərdən məktəbi sona çatdırması da çətinlik yaradırdı. Polis Akademiyası ilə universitetlərin hüquqşünaslıq ixtisasına keçid balı təxminən eyni olduğu üçün, qızlar hüquq ixtisası üzrə təhsilini başa vurduqdan sonra DİN-ə müraciət edə bilərlər. Polis orqanlarında çalışan qadınlar isə müvafiq sənədləri toplayıb, Polis Akademiyasının qiyabi bölməsində təhsil üçün müraciət edə bilərlər”.
Sosioloq Əhməd Qəşəmoğlunun fikrincə isə burada nə Nazirlikdə, nə də Polis Akademiyasında heç bir günah yoxdur. Onun sözlərinə görə, problemin əsas səbəbi yeni nəslin tərbiyə sistemində və cəmiyyətdə gedən proseslərdədir.
.jpg)
“Bir vaxtlar Avropa və ABŞ-a baxaraq, Akademiyaya qəbul təşkil edib, cəmiyyətimizi daha müasir göstərmək istəyiblər. Amma sonunda bunun mümkün olmadığını görüblər. Bu gün bizim yeni nəslin tərbiyəsində xeyli problem var. Biz oğlan və qızlarımızı körpə yaşından düzgün tərbiyə etmirik. Bəzi oğlanların davranış mədəniyyəti arzuolunan səviyyədə deyil. 3-4 yaşlı oğlan uşaqlarına “filankəsin qızını sənə alacam, get onu qucaqla, saçından dart” və s. deməklə tərbiyələrini düz yönəltmirik. Onlar da 14-15 yaşına çatanda elə bilirlər ki, qızları aldatmaq bir qəhrəmanlıqdır. Qızlarımızı da elə tərbiyə edirik ki, onlar 10 yaşına çatandan sonra oğlanlardan hürkürlər, onlara bir təhlükə mənbəyi kimi baxırlar”.
Ekspertin sözlərinə görə, düzgün tərbiyə metodu seçilsə, oğlanlar qızlara ancaq mehriban münasibət göstərərdi.
“Ümumiyyətlə fiziki cəhətdən güclü olanlar zəiflərə kömək etməlidir. Qızlarımız da özünü oğlanlarla necə aparmağı bilmir, dünya görüşü, təcrübəsi, mənəvi sistemi buna izin vermir”.
Gülnar Səlimova
