Erkən nikahlar günümüzdə hələ də aktuallığını itirmir. Zaman-zaman mətbuatda yetkinlik yaşına çatmayan qızların zorla ərə verildiyi, bir müddətdən sonra onun başqasıyla qoşulub qaçdığı və ya ailədaxili zorakılığa məruz qaldığı barədə məlumatlar yer alır. Əfsuslar olsun ki, hələ də bu faciələrə ciddi yanaşmayan ailələr var ki, illərdir davam edən bu dəhşətli “tendensiyanı” davam etdirməkdən çəkinmirlər. Bəs, erkən nikahlar və onların fəsadları haqqında mütəxəssislər nə düşünürlər? Erkən nikahların başlıca səbəbləri nələrdir? 

Məsələ ilə bağlı “Təmiz dünya” Qadınlara Yardım İctimai Birliyinin sədri Mehriban Zeynalova Ednews-a açıqlamasında bildirib ki, erkən nikahların başlıca səbəbləri qadınlara qarşı münasibətlərin mənfi tendensiya kimi formalaşması, onlara qarşı olan ayrı-seçkilik, o cümlədən təhsil və sosial dəstək məsələləridir:   

“Erkən yaşda ailə qurmuş qadınların 39 faizi şəhər, 61 faizi kənd sakinləridir. 18 yaşınadək ərə gedən qadınların öz istəyi ilə, 26 faizi valideynlərin təzyiqi altında, 11 faizi ailənin maddi vəziyyəti çətin olduğundan, 10 faizi isə digər səbəblərdən erkən nikaha daxil olublar. Düşünürəm ki, erkən nikahları İslam dini ilə əlaqələndirmək düzgün deyil. Bu məsələdə Qafqaz Müsəlmanları idarəsinin sədri Allahşükür Paşazadə bildirir ki, erkən nikahların qarşısını almaq üçün qanunvericilik mütləq şəkildə sərtləşdirilməlidir. Ölkəmizdə cəza tədbirlərini gücləndirmək və evlilik üçün 17 yaşı aradan götürmək lazımdır”.

Aysel İskəndərli