Ramazan ayı ilə əlaqədar orucu pozan hallar ən çox verilən suallardandır. İnsanlar arasında oruc tutarkən unutqanlıqdan yemək, içmək, diş fırçalamaq, saqqız çeynəmək kimi halların orucu pozduğuna dair şübhələr yaranır. Bəs orucu pozan hallar hansılardır?

Mövzu ilə bağlı Ednews-a açıqlamasında ilahiyyatçı Tural İrfan bildirdi ki, bilmədən yemək, içmək, qusmaq orucu pozmur:

"Diş fırçalamaq isə ümumiyyətlə orucu pozmur, əksinə müstəhəbdir. Çünki oruc tutan adamın mədəsindən qoxu gəlir, başqalarını narahat edir. Odur ki, misvak və ya digər üsullarla dişləri təmizləmək lazımdır, bu, orucu pozmur. Əgər saqqızın tərkibində qidalandırıcı maddə, dad yoxdursa, həmin saqqızı çeynəmək də orucu pozmur.

Ağızı su ilə qarqara etmək, çimmək orucu pozmaz. Yalnız bilərək yemək, içmək, cinsi əlaqədə olmaq orucu batil edir. Bəzi din alimləri ehtiyata əsasən orucu pozan işlərin sayını artırıblar. Məsələn, Allahın, Peyğəmbərin, İmamların adına yalan istinad edib danışmaq, başı tamamilə suya batırmaq, sübh əzanına qədər cənabətli qalmaq kimi... Ancaq şübhəsiz ki, oruc tutan adam yalan danışmamalıdır, pis əməllərdən uzaq durmalıdır, di gəl ki, yalan danışmaq orucu pozmasa da günah sayılır".

İlahiyyatçı qeyd etdi ki, bəzən oruc tutmağı çətinləşdirirlər:

"Bəziləri hətta tüpürcəyi udub udmamaq haqqında o qədər düşünür, soruşur ki, həddindən artıq tərəddüd yaranır. Belə olmaz. İstismarçı din tacirləri, ruhanilər sadə müsəlman camaatı çətinə salmamalıdır. Qurani Şərifdə necə əmr olunubsa oruc elə tutulmalıdır. Səfərdə olan adam ixtiyar sahibidir. Əgər əziyyət olacaqsa rüxsətlidir, tutmaya bilər.

Ağrıkəsici iynələr olar, ancaq qidalandırıcı sistemlər orucu pozar. İmalə əgər qidalandırandırsa o da pozar. Yox əgər bağırsaq tıxanması kimi problemlərə görə edilirsə pozmaz. Qusmaq orucu pozmaz. Ancaq bilərək qusmaq pozar".

Oğuz