Qərbi azərbaycanlı Kərimova Səhran nənə ermənilərin Qərbi azərbaycanlıların deportasiyası və Azərbaycan ərazisində məskunlaşdıqları zaman yaşadığı çətinliklərdən danışıb.

EdnewsTV-ə müsahibəsi zamanı 90 yaşlı sakin, erməni zülmündən qurtulmaq üçün keçdiyi çətin yoldan danışıb:

“1988-ci il idi, ermənilərin qırğını düşdü, Naxçıvanın yolunu bağladılar, Qubadlıya yola düşdük. İkimiz oğlumla sürünə-sürünə iki gün yol getdik və dedik erməni görsək özümüzü kanala atarıq. Birdən gördük yolda bir milis gəlir. Soruşdum ki, baxın görün haranın milisidir? Dedilər erməni milisidir. Milis gələndə dedim deyin ki, guya qoyun-quzu itirmişik ona görə buradayıq. Milis avtomobili yanımda saxladı, mən də başımla yox-yox elədim.

Yanımdakılara dedim ki, qaçaq qabaqda gizlənək. Qabaqda qəbirstanlıq gördüm, fikirləşdim ki, görəsən azərbaycanlıların qəbirstanlığıdır, yoxsa erməni. Bilmirəm mənim səsimi necə eşitdilərsə, bizə səsləndilər ki, aşağı enin. Azərbaycanlılar idi. Məni bürüdülər yorğana, qoydular avtomobilə və dedilər ki, səssiz olum. 

Dedilər Moskvadan Qubadlıya adam gəlib, bunları götürək ora. Apardılar bizi Çardaxlı adlı bir yerə, orda qohumum var idi. Oradakılar heç kirimədi, bir də gördüm ki, polis gəldi, müstəntiq gəldi. Hamısını tanıyırdım. Mən gələndə birdən-birə qışqırıq qopartdılar. Mən dedim ki, bala mən sağam. Elə eləməyin ki, millət ayağa qalxsın. 36 ilidir indi, Allah dəyməsin sizə, göydə Allah, yerdə isə sizin kimi oğlanlar yaşadıb bizi. O oğlanlar da olmasa daha gedə bilməzdik, iki gün yol getmişdik”.

Xatırladaq ki, Beynəlxalq Avrasiya Mətbuat Fondunun Azərbaycan Respublikası Qeyri-Hökümət Təşkilatlarına Dəstək Agentliyi ilə birlikdə həyata keçirtdiyi Qərbi Azərbaycanlıların Deportasiyasının virtual muzeyinin yaradılması ilə əlaqədar layihəsi davam etməkdədir. 

Daha ətraflı video süjetdə:

Fərid