İlahiyyatçı Elşad Miri qəbir əzabının olmadığını iddia edib. Onun bu açıqlaması ictimaiyyətdə birmənalı qarşılanmayıb. Sosial şəbəkələrdə tənqid atəşinə məruz qalan Elşad Mirinin sözləri əksər istifadəçiləri qəzəbləndirib.
İlahiyyatçının bu açıqlamasından sonra sual yaranır: doğrudan da qəbir əzabı varmı?
Mövzu ilə bağlı Ednews-a açıqlamasında ilahiyyatçı Tural İrfan bildirdi ki, qəbir əzabı məcazi mənadadır. İndi qəbir əzabını onlar edənlər Peyğəmbərin zamanında Allahı da inkar edirlər ki, onu bizə göstər. Yaxud öləndən sonra dirilməni inkar edirdilər ki, sümüklər necə ayağa qalxa bilər. Quranda qəbir əzabına işarə edən bir neçə ayə var. Çoxsaylı hədislər var. Qəbir əzabı hərfi mənada başa düşülən məzarın içində insana əzab verilməsi demək deyil:
"İnsan öldükdən sonra qiyamətə qədər olan zaman məsafəsində, gözləmə məntəqəsində əməllərinin nəticəsi olaraq ya əzab, ya da rahatlıq içində qalmasına qəbr əzabı, yaxud qəbir rahatlığı deyirlər. Peyğəmbərin bir hədisində deyilir ki, qəbir möminə cənnət bağçalarından bir guşə, kafirə isə cəhənnəmdən bir çuxurdur. Buradan görünür ki, insan öldükdən sonra qiyamət qopana qədər onun ruhu sərgərdan dolaşmır. Allahın müəyyən etdiyi, insan təfəkkürünün dərk etməkdə aciz olduğu bir aləmdə ya ilahi feyz, ya da ilahi əzab içində gözləyir. Bunu ölmüş adamların yuxuları da hiss etdirir çox zaman. Qəbir bərzəx mənasında işlənir. Bərzəx isə keçid, sərhəd deməkdir. İnsanın dünyadan axirətə keçid məntəsində qarşılaçacağı hadisələrdir. Bu da şübhəsiz ki, ruh və insanın təmsili ilə əlaqədardır. Gözlə görülən bədənə əzab vermək deyil, ruha geydirilmiş təmsili bədəndən söhbət gedir ki, onun cism olması, əzab görməsi mümkündür. Əgər bu inancın barəsində olan ayələri qəbul etmirlərsə onda fəlsəfi cəhətdən sübut etsinlər ki, yoxdur. Sadəcə "yoxdur" deyib bu şeylərdən o qədər də xəbəri olmayan sadəlövh adamların beynini qarışdırmaq din deyil. Din insanları çaşbaş və şübhəyə salmaq yox, onları sabitqədəm etmək üçün, şübhədən çıxarmaq üçün nazil edilib".
T.İrfan qeyd etdi ki, Ğafir surəsi 46 cı ayədə buyurulur: "Onları səhər və axşamüstü oda salırlar. O Saat gələcəyi gün isə; Firon nəslini ən şiddətli əzaba salın!"
"Burada iki əzabdan söhbət gedir. Bir səhər və axşam verilən əzab. İkincisi, ən əsası isə gələcək zamanda, qiyamət günü gəldikdə daha şiddətli şəkildə veriləcəyi aydın qeyd olunur. Demək qiyamətdən qabaq da əzab var. Bax bu əzab məhz qəbr əzabıdır.
Həmçinin Tövbə surəsinin 101 ci ayəsində buyurulur: "Çevrənizdəki bədəvilərdən və Mədinə əhalisi arasında münafiqlər var. Onlar ikiüzlülükdə inadkarlıq göstərir, sən isə onları tanımırsan. Biz ki, onları tanıyırıq. Biz onlara iki dəfə işgəncə verəcəyik. Sonra isə böyük bir əzaba qaytarılacaqlar."
Burda açıqca iki əzabdan söhbət gedir. Aydın da göstərilir ki, böyük əzabdan, qiyamət əzabından əvvəl kafirlərə, fasiqlərə, Allahın ayələrini inkar edənlərə Allah hətta iki dəfə əzab verəcək. Bu ayələri inkar etmək yaxud təhrif etmək dindən çıxmaqdır."
Oğuz
