Azərbaycanda iyun ayının 1-dən taksilərdə minimal gedişhaqqının 4 manat 50 qəpik olacağı ilə bağlı informasiyalar yayılmaqdadır. Bununla bağlı sosial şəbəkələrdə məlumatlar paylaşılır. Yayılan məlumat taksi şirkətlərində çalışan sürücülərə istinadən verilib.

Ednews məlumatların doğruluğunu yoxlamaq üçün Azərbaycanda fəaliyyət göstərən bir neçə taksi şirkətinin nümayəndələri ilə əlaqə yaradıb. 

“Bolt” taksi şirkətinin Azərbaycan nümayəndəliyinin icraçı direktoru Naim Əzizov yayılan informasiyaların  həqiqəti əks etdirmədiyini vurğulayıb. 

Nəqliyyat məsələləri üzrə ekspert Aslan Əsədov açıqlamasında bildirdi ki, sürücülərə məlumatın doğruluğuna dair demək olar məlumat verilib. 

“Amma hələ ki, rəsmi olaraq bildirilməyib. Çünki bilidirişlər sürücülərə sms vasitəsi ilə göndərilmişdi. Bu haqda məlumatlandırılıblar. Belə qərarlar əsasən AYNA ilə razılaşdırılmış şəkildə olur. Ondan sonra müvafiq olaraq hər hansı bir qərar qəbul edilə bilər”.

Ekspert onu da qeyd etdi ki, bəzən sui-istifadə hallarına da rast gəlinir. 

“Bəzən olur ki, qiymətləri şişirtməklə, süni qaldırmaqla və yaxud qalxacağı ilə bağlı məlumat yaymağa  çalışırlar. Düzdür bu informasiyalar əksər vaxt özünü doğruldur. Tövsiyyə edərik ki, rəsmi məlumatlara və rəsmi qərarlara istinadən məlumatları paylaşsınlar. Belə olan halda hər hansı bir narahatçılıq yaranmayacaq”. 

Məsələ ilə bağlı Azərbaycan Yerüstü Nəqliyyat Agentliyinin (AYNA) mətbuat katibi Tural Orucov da  sorğumuza cavab olaraq bildirib ki, taksi minik avtomobilləri ilə daşıma qiyməti tələb və təklif əsasında müəyyən olunur: 

“Hazırda qiymət fəaliyyət göstərən taksi operatorları tərəfindən rəqabət şəraitində formalaşır”.

Aynurə İsmayıl