Xəbər verdiyimiz kimi, mayın 21-də Tərtər rayonunda mina partlayışı baş verib. Hadisə Həsənqaya kəndi ərazisində qeydə alınıb və 1965-ci il təvəllüdlü Hacıyev Arzu Nəcəf oğlu keçmiş təmas xətti yaxınlığında, minalardan təmizlənməmiş ərazidə heyvan otararkən minaya düşüb. O, aldığı xəsarətlərdən hadisə yerində həyatını itirib.

Hadisə ilə bağlı Beynəlxalq Avrasiya Mətbuat Fondunun prezidenti Umud Mirzəyev Ednews-a açıqlamasında bildirdi ki, mina hadisələrindən itkilərimiz davam edir. Onun sözlərinə görə, demək olar hər gün partlayış səsləri eşidirik:

“Ötən gün baş verən mina hadisəsi hər kəsi üzdü. Həsənqaya kəndi bu günləri Qarabağda ən çox minadan zərərçəkən yaşayış məntəqəsidir. Burada hər evdə, ailədə, bir və ya iki nəfər minadan zərər çəkib. Partlayış olan yerdən bir neçə gün əvvəl sözügedən əraziyə yaxın idim. Biz orada insanlarla mina ilə bağlı maarifləndirici söhbətlər etdik. İnsanlarımız diqqətli olmalıdırlar, ehtiyatsızlıq ucbatından, minadan təmizlənməyən ərazilərə girərək həyatlarını təhlükəyə atırlar. Qarabağda yol boyu, yaşayış məntəqələrində mina ilə bağlı maarifləndirici lövhələr var”.

U.Mirzəyev basdırılan minaların və onun törətdiyi dəhşətləri bəşəri cinayət adlandırıb:

“Dünyada mina istehsalçısı ölkələr arasında Ermənistan da var. Ermənistanın Qarabağda keçirtdiyi qeyri-insani vandalizm aktları sözlə ifadə olunmayan miqyasdadır. Mina hərbi həmlələrin qarşısını almaq üçün  yaxud başqa səbəblərə görə istifadə olunar. Yoxsa ki, insan həyatını məhv etmək, cinayətdir. Ermənilər isə hər yerə mina basdırıb – su hövzələrinə, məzarlıqlara, yollara və yol kənarlarına, dağıdılmış evlərə. Bu da terrordur. Bunun bircə adı var – bəşəri cinayət! Ermənilər mina problemini yaratmaqla, həm də özlərinin vəhşi xislətlərini göstəriblər. Azərbaycan minalarla ən çox çirklənmiş ölkədir. Bu gün Azərbaycan və Ermənistan sülhdən danışır, ancaq sağdan, soldan prosesi pozmağa və ləngitməyə çalışan qüvvələrin mesajları, açıqlamaları çıxır ortaya”.

Oğuz