"Digər sahələrdə olduğu kimi, şahmatda da tarix boyu elə şahmatçılar olub ki, onlar kişilərlə eyni səviyyədə mübarizə aparıblar".

Bu fikirləri Ednews-ə açıqlamasında Azərbaycanın qadın şahmatçısı, beynəlxalq qrossmeyster, 2002-2007-ci illərdə Azərbaycan Şahmat Federasiyasının prezidenti olan Aynur Sofiyeva deyib. 

O bildirib ki, beynəlxalq qrossmeyster Şəhriyar Məmmədyarov Azərbaycan şahmatında öz sözünü demiş, dünyada ölkəmizi tanıdan və bu prosesə böyük töhfə verən dəyərli şahmatçımızdır:

"Hamımız ona hörmətlə yanaşırıq. Lakin dünyada elə qadın şahmatçılar var ki, hətta ən güclü kişi şahmatçıları da məğlub ediblər. Misal olaraq, Yudit Polqarı və Nona Qaprindaşvilini göstərə bilərik. Bu da onu göstərir ki, qadın şahmatçıların da potensialı var və istədikdə kişilər arasında da ən yüksək nəticələr əldə etməyə qadirdirlər. 

Ümumilikdə isə müqayisə etsək, dünyada olan şahmatçılar arasında qadınların sayı kişilərdən çox azdır. Bu gün dünyada gedən proseslər o istiqamətdədir ki, cəmiyyətdə gender bərabərliyi təmin edilsin, qadınlar üçün bərabər şərait və imkanlar yaradılsın, dəstəklənsin. Bunun da müqabilində qadınlar öz potensiallarını göstərərək böyük nəticələr əldə edə bilərlər". 

A.Sofiyeva bildirib ki, bu gün də siyasətdə, elmdə, incəsənətdə, idmanda kişilərlə çiyin-çiyinə mübarizə aparan, öz sözünü deyən qadınların uğurlarının şahidi oluruq. Hətta hökmdar qadınımız Tomrisin adını çəkə bilərəm:

"Azərbaycanda da son onillikləri müqayisə etsək qadınlarımızın hər bir sahədə qazandığı uğurları, əldə etdiyi yüksək nəticələri, ona verilən imkanları necə dəyərləndirdiyini görə bilərik və bu inkişaf davam edir. 

Bu məsələnin dövrümüzdə prioritetə çevrilməsi isə onu göstərir ki, qadınların potensialı, bacarığı onların hər bir sahədə uğur qazanmaları üçün kifayət qədərdir, sadəcə bu sahədə də kütləviliyi təmin etmək və onlara imkanlar təqdim etmək lazımdır".

Səfər Əlizadə