Xəbər verdiyimiz kimi ötən gecə Qəzzada Əl-Cəzirə telekanalının müxbiri İsmayıl Al-ğul və kameramanı Rami al-Rafi İsrail- HƏMAS müharibəsinin qurbanı olub. Bununla bağlı "Əl-Cəzirə" Media Şəbəkəsi bəyanat yayaraq olayı pisləyib.
Ednews xəbər verir ki, Beynəlxalq Avrasiya Mətbuat Fondunun prezidenti Umud Mirzəyev də "Əl-Cəzirə" jurnalistlərinin faciəvi ölümünə münasibət bildirib:
"Üzücü xəbərdir. Müharibənin ağrı-acı dolu tərəflərindən biri də insan faciələrinə səbəb olmasıdır. "Əl-Cəzirə" jurnalistlərinin ölümü olduqca kədərli hadisədir. Ümumiyyətlə jurnalistlərin qaynar-münaqişə ocaqlarında ölümlə üz-üzə qalması bu peşə sahiblərindən nə qədər böyük risk, cəsarət tələb edildiyini göstərən faktdır. Mən də Ukrayna, Qəzza və.s kimi münaqişə ocaqlarında insan itkilərinə səbəb olan faciəvi halların aradan qaldırılmasını, sülhün bərqərar olmasını zəruri sayıram".
"Əl-Cəzirə" əməkdaşlarının ölümündən kədərləndiyini bildiriən Umud Mirzəyev qeyd etdi ki, "Əl-Cəzirə" Media Şəbəkəsi ilə BAMF arasındakı əməkdaşlıq əlaqələri dünyanı yaxşılığa doğru dəyişmək istəyinə və etimada əsaslanır.
Qeyd edək ki, Qəzza münaqişəsi başladığı 7 oktyabr 2023 tarixindən etibarən 163 jurnalist həyatını itirib.
Xatırladaq ki, münaqişə zonalarında fəaliyyət göstərən jurnalistlərin müdafiəsinə töhfə verməklə, söz və ifadə azadlığı, obyektiv informasiyanın yayılması istiqamətində BAMF, Əl-Cəzirə Media Şəbəkəsinin peşəkar fəaliyyətini və onun missiyasını dəstəkləyir.
Əkbər Novruz
