Xəbər verdiyimiz kimi, Bu gün Dünya Çempionatının 1/4 final mərhələsinə start veriləcək. Mundialda artıq 8 milli komanda qalıb. Bunlar Braziliya, Xorvatiya, Argentina, Hollandiya, Portuqaliya, Mərakəş, İngiltərə və Fransadır.
Bu millilərdən hansı ölkə dünya kubokunun sahibi olacaq?
Ednews bununla bağlı tanınmış şəxslərin proqnozlarını öyrənib.
Maraqlıdır, məşhurlardan kim hansı komandaya azarkeşlik edir?
Millət vəkili Siyavuş Novruzov:
“Mərakeşin 1/4 finala çıxması sürpriz oldu. Düzü, oyunları çox izləyə bilmirəm. Həssas dövrdür, başım qarışıq olur. Həm də, hələ ki, hansı ölkənin qalib gələcəyi ilə bağlı tam əminliyim yoxdur. Hansısa komandaya azarkeşlik edirsən, sonra görürsən ki, növbəti dəfə uduzurlar. Ona görə, bu barədə əmin danışmaq mümkün deyil. Lakin çempionatda məni təəccübləndirən hadisələr də oldu. Futbolçulardan Messini, Brazilyanın oyunçularını izləyirəm”.
Şair Qismət Rüstəmov:
“Kimin çempion olacağına proqnoz vermək çətindir. Mən Messiyə görə Argentinaya azarkeşlik edirəm”.
AFFA-nın Mətbuat və ictimaiyyətlə əlaqələr şöbəsinin müdiri Firuz Abdulla:
“Proqnoz verməyi sevmirəm. Oyun keyfiyyətinə görə ən iddialı komandalar, məncə, Fransa və Braziliyadır”.
İdman şərhçisi Asif Bağırov:
“Düşünürəm ki, hər şey Braziliya-Fransa finalına doğru gedir. Qalib məsələsində şanslar 50-50-dir. Risk edib Fransa deyərdim, nə qədər bunu istəməsəm də. Baxmayaraq ki, Braziliyaya da elə azarkeşliyim yoxdur”.
İdman blogeri Elmar Rza:
“Mənim könlüm Argentinadan yanadır. Messi və komanda yoldaşlarının çempion olmasını arzulayıram. Lakin düşünürəm ki, əsas favorit Fransa millisidir. "Üçrənglilər" daha komplekt və hər mövqeyə bir neçə alternativi olan güclü kollektivdir”.
Oğuz Ayvaz