Ticarət mərkəzləri və ya bəzi satış yerlərində bəzən müştəriləri narahat edəcək hallar baş verə bilir. Bunlardan biri də müştərinin satıcı tərəfindən narahat edilməsidir. Belə ki, müştəri mağazaya daxil olduğu andan satıcı onu izləyir, yaxından müşahidə edir. Bu da gələn müştəriləri narahat edir, hətta alışı istədikləri halda həyata keçirmədən uzaqlaşırlar. Çünki müştərilərdə satıcıların onlara güvənmədiyi fikri formalaşır. Təbii ki, bu da satış prosesinə ziyan vurur. Hər iki tərəfdən baxdıqda bu hal doğru sayılırmı? Əslində satıcılar müştəri içəri daxil olduqda necə davranmalıdır?
"EDnyus" xəbər verir ki, mövzuyla bağlı Valyuta.az-a açıqlamasında marketoloq Ruslan Qocayev bildirib ki, bu kimi problemlər aktualdır və pərakəndə satış yerlərində daha çox nəzərə çarpır: “Müştəri ilə satıcı arasında qeyri-verbal, danışıq və digər təmas olmamalıdır. Elə müştəri var ki, o dükana gələndə, nə almaq istədiyini bilir. Müştərinin hərəkətindən, içəri daxil olarkən getdiyi tərəfdən və.s bilinir ki, gələn müştəri nə istədiyini tapacaq. Belə bir müştəri ilə qarşılaşdıqda satıcı artıq onu narahat etməməlidir. Elə müştəri də var ki, satıcı gələn müştərinin axtarışda olduğunu hiss edir. Müştərinin axtarış hərəkətlərini, fikirləşməsini gördükdə, yaxınlaşaraq özünü təqdim etməlidir”.
“Satıcı müştərini hiss etməlidir”
R.Qocayev bildirdi ki, satıcının müştərinin hərəkətlərinə uyğun davranması onun peşəkarlığını göstərir: “Satıcı müştərini hiss etməlidir. Satıcıların peşəkarlığı onda bilinir ki, onlar müştəriyə hiss edilməyən "təkan" verərək onu alış etməyə sövq edirlər. Düzdür, elə məhsullar var ki, orda peşəkar konsultasiya tələb olunmur, lakin elə məhsullar var ki, orda peşəkar konsultasiya əksər hallarda mütləqdir. Məsələn, kompüter, telefon, TV, və digər avadanlıqlar, dərmanlar və s. bu kimi məhsulların satışında peşəkar satıcı artıq satış strategiyasını tətbiq etməyi bacarmalı, düzgün ünsiyyət qurmalıdır. Bundan başqa, bədən dilini - üz ifadəsi, bədən hərəkətləri, əl hərəkətləri və.s bilmək həm satıcı- müştəri əlaqəsinə, həm də satış strategiyasına müsbət təsir göstərir”.
“Təlimlər müştəri-satıcı əlaqəsini qoruyur”
R.Qocayev satış strategiyasında təlimlərin vacibliyini də vurğulayıb: “Rəhbərliyin rolu ondan ibarətdir ki, əsasən, satıcı personalına, sırf satışla məşğul olanlara mütləq peşəkar təlimlər keçməlidir. Satışı həyata keçirən pərakəndə satış mərkəzlərində birbaşa satıcının özüdür. Satıcı və müştəri arasında olan əlaqəni qorumaq üçün təlimlərin olması mütləqdir. Hər bir biznes gəlir qazanmalıdır. Gəlirin əsas mənbəyi isə satışdandır”.
“Satıcı-müştəri əlaqəsini qorumaq üçün Avropa və ABŞ-da bəzi mağazalarda belə bir fərqləndirici xüsusiyət var. Girişdə iki rəngdə - qırmızı və yaşıl səbət qoyurlar. Əgər müştəriyə hər hansı kömək lazım olsa, o yaşıl səbəti götürür, yox əgər lazım deyilsə, qırmızı səbət götürür”.
