Ukrayna rəsmiləri dünən Rusiya qüvvələrinin Ukraynanın Zaporojye vilayətində Atom Elektrik Stansiyasında bir neçə reaktiv yaylım atəşi sistemləri quraşdıraraq işə saldığını iddia ediblər. 

Ednews “Independent”-ə istinadən bildirir ki, hazırda Ukrayna tərəfinə görə Avropanın ən böyük atom elektrik stansiyasının Ukrayna ərazisini atəşə tutmaq üçün Rusiya tərəfindən baza kimi istifadə olunması və radiasiya təhlükəsini artırma riski ciddi təhlükə meydana gətirib.

Ukraynanın “Enerqoatom” nüvə şirkəti bildirib ki, bağlanan zavodu ələ keçirən Rusiya qüvvələri altı nüvə reaktorundan birinin yaxınlığında bir neçə “Qrad” reaktiv yaylım atəşi sistemi yerləşdirib. Bu isə müharibə çərçivəsində Rusiyanın nüvə və radiosiya təhlükəsizliyi üçün şərtləri pozması kimi qəbul edilir. 

Qeyd edək ki, Sovet istehsalı olan çoxsaylı reaktiv yaylım atəşi sistemləri 40 kilometrə qədər raket atmağa qadirdir. Eyni zamanda, “Energoatom” bildirib ki, həmin raket qurğuları Rusiya qüvvələrinə Dnepr çayının əks sahilini vurmağa imkan verə bilər.  Hazırda Rusiya tərəfi Nikopol və Marhanets şəhərlərinə müntəzəm olaraq atəş zərbələri endirir. Zavod isə Ukraynanın cənubunda, Kremlin qanunsuz olaraq ilhaq etdiyi bir bölgədədir.

Elnur Ənvəroğlu