Rusiya ordusu Ukraynanın şimalında yerləşən Priluki şəhərinə endirdiyi dron hücumu ilə azı 6 nəfərin ölümünə səbəb olub. Həlak olanlar arasında 1 yaşlı uşaq da var. Bu barədə Çerniqov vilayətinin qubernatoru Vyaçeslav Çaus məlumat verib.

Məlumata görə, hücum ABŞ Prezidenti Donald Tramp ilə Rusiya Prezidenti Vladimir Putin arasında baş tutan telefon danışığından bir neçə saat sonra baş verib. Tramp, danışıqdan sonra verdiyi açıqlamada, Putinlə Ukraynanın iyunun 1-də Rusiya hərbi hava bazalarına etdiyi dron hücumuna "çox sərt" cavab veriləcəyi barədə danışdıqlarını demişdi.

Prilukidə baş verən hücum nəticəsində daha 6 nəfər yaralanıb. Qubernatorun açıqlamasına görə, şəhərə atılan 6 ədəd “Şahed” tipli dron yaşayış məhəllələrinə düşüb və nəticədə çoxsaylı binalar zədələnib.

Bundan bir neçə saat sonra Ukraynanın şərqində yerləşən Xarkov şəhəri də dron hücumuna məruz qalıb. Vilayət rəhbəri Oleh Sinehubovun sözlərinə görə, hücum nəticəsində 17 nəfər – o cümlədən uşaqlar, hamilə qadın və 93 yaşlı bir qadın yaralanıb. Xarkovun Slobidskiy rayonunda iki çoxmərtəbəli binaya zərbə endirilib, yanğın baş verib və bir neçə avtomobil sıradan çıxıb.

Digər tərəfdən, Rusiya Xarici İşlər Nazirinin müavini Sergey Ryabkov bildirib ki, Ukraynanın iyunun 1-də Rusiya hərbi hava bazalarına etdiyi hücum nəticəsində bəzi təyyarələr zədələnsə də, tam məhv edilməyib və onlar tezliklə bərpa olunacaq.

Amerikalı rəsmilərin “Reuters” agentliyinə verdiyi məlumata görə, həmin hücum zamanı təxminən 20 Rusiya hərbi təyyarəsi zərər görüb, onlardan 10-u isə məhv edilib. Bu rəqəm Ukrayna Prezidenti Volodimir Zelenskinin açıqladığı saydan iki dəfə azdır.

Fatimə Şükürova // EDnews